Fizarà 5

Nanomboke Tamy Fanandevoza Ta-Babylona Tany Zisiky Tamy Fanamboara ty Rindrin’i Jerosalema

Notsapà tamy raha maromaro ty finoan’Israelita reo laha fa niandevo ta-Babylona tany roze. Nampilìry tamy lafaoro misy afo mirehitse zay Sadraka, Mesaka noho Abednego, fe naboaki-Ndranahare bakao roze. Laha fa naharesy an’i Babylona, ty Mediana noho Persiana, tafara atoy, le nalatsake tan-davake misy liona tao Daniela. Fe niaro an’i Daniela Andranahare, ka nihilìane ty vava liona reny.

Tamy farane le nafàhan’i Kyrosy mpanjakan’i Persia ty Israelita. Laha fa afake 70 tao tafara’ty nandaìsa an-droze ho andevo ta-Babylona tany, le nimpòly tan-tanindrazan-droze tany Israelita reo. Ka ty raha voalohane nataon-droze laha fa niavy ta-Jerosalema tao roze, le ty fanamboara ty tempolin’i Jehovah. Fe tsy ela le nisy fahavàlo nandrara an-droze tsy hanao asa io, ka najàno fanamboara tempoly iny. Ka 22 tao tafara’ty niavian-droze ta-Jerosalema tao vo nivita tempoly iny.

Laha fa vita iaby rezay, le hianatse mikasike ty fimpolìan’i Ezra ta-Jerosalema tao, mba hanamboatse soa tempoly iny tsika. Niseho raha zay 47 tao teo ho eo tafara’ty nahavità tempoly io. Bakeo, nanampy ty olo tamy fanamboara rindrin’i Jerosalema nikopake iny Nehemia, 13 tao tafara’ty lia nataon’i Ezra. Fizarà FAHALIMY toy le ahità tantara naharitse 152 tao.