Na ini a ten di den Israelsma ben de na ini katibo na Babilon, dan den ben kisi furu tesi tapu den bribi. Wan kownu ben meki den iti Sadrak, Meisak nanga Abedneikow go na ini wan bun faya onfu, ma Gado ben puru den libilibi na ini. Bakaten, di den Mediasma nanga Persiasma ben wini Babilon, dan feanti ben meki den iti Danièl go na ini wan lew-olo, ma Gado ben kibri Danièl tu, fu di Gado ben tapu den mofo fu den lew.

Te fu kaba, dan a kownu fu Persia ben meki den Israelsma kon fri. Den ben drai go baka na a kondre fu den. Dati ben de soifri 70 yari baka di den ben tyari den leki strafuman go na Babilon. Wan fu den fosi sani san den ben du di den ben drai go baka na Yerusalem, ben de fu bigin bow Yehovah tempel. Ma heri esi feanti ben tapu a wroko fu den. Dati meki a ben de sowan 22 yari baka di den ben drai go na Yerusalem, taki den ben kon klari nanga a tempel te fu kaba.

Moro fara wi e kon leri fa Esra ben drai go baka na Yerusalem fu meki a tempel kon moi. Dati ben de sowan 47 yari baka di a tempel ben kon klari kaba. Dan Nehemia ben yepi fu bow den broko skotu fu Yerusalem nyun baka sowan 13 yari baka di a ben go na Yerusalem. Pisi 5 o luku 152 yari historia.