Nákha israelitas kúwi̱i̱n xóo esclavos náa Babilonia, ra̱ʼkhá tháán niguáʼdáá wéñuʼ xkujndu ga̱jma̱a̱ numuu fe ndrígu̱ún. Sadrac, Mesac ga̱jma̱a̱ Abednego nijtin náa mbá horno rí mi̱jkha̱ mbanda̱ʼkho wéñuʼ, mú ikhiin nduya índo̱ Dios niguwíin. Nda̱wa̱á, índo̱ xa̱bu̱ bi̱ kuwa náa Babilonia taʼngu̱u̱n gúxnamijná gajmiún xa̱bu̱ medos ga̱jma̱a̱ xa̱bu̱ persas, Daniel ni̱jkuáa náa iñáʼ rí kajtiin león, mú ma̱ngaa Dios niñawu̱u̱n índo̱ nirugoo rawúunʼ león.

Nda̱wa̱á kayuʼ, rey Ciro xa̱bu̱ persa niʼni káwíin israelitas. Ikhiin nitangi̱i̱n náa xuajñún 70 tsiguʼ nda̱wa̱á rí ni̱jkha̱ kiʼdiin xóo esclavos náa Babilonia. Templo ndrígóo Jeobá ñajunʼ rí phú nigi̱ʼdi̱i̱ nini ginii índo̱ ikhiin nitangi̱i̱n náa Jerusalén. Mú nacha̱ má xa̱bu̱ bi̱ guáʼdáá gajmiún sia̱nʼ nánguá niniñanʼ muñajunʼ itháan. Niʼni má 22 tsiguʼ nda̱wa̱á rí ikhiin nitangi̱i̱n náa Jerusalén índo̱ niguámbu̱u̱n nini templo.

Nda̱wa̱á, najmañulúʼ rí xú káʼnii Esdras natanga̱a̱ náa Jerusalén mu maʼni̱i̱ mitsaan templo. Rígi̱ nirígá 47 tsiguʼ nda̱wa̱á rí niguáxi templo. Ikhú, 13 tsiguʼ nda̱wa̱á rí Esdras nitanga̱a̱ náa Jerusalén, Nehemías niñambá mu maʼni̱i̱ xtátsí ndrígóo Jerusalén dí nijngudiriga̱a̱. Náa NÍʼKHÓO 5 naʼthí xúgíʼ dí nirígá mbá 152 tsiguʼ.