Akxni li Israel xkachilinkanit chu anta xwilakgocha kBabilonia, makglhuwa tasiyalh la xwi xtakanajlakan. Sadrac, Mesac chu Abednego kamujuka kxachichi horno, pero Jehová kamakgtayalh chu xastakna kamaxtulh. Titaxtulh kilhtamaku akxni Media chu li Persia, akgchipakgolh Babilonia, Daniel mujuka anta niku xwilakgolh leones, pero Dios na makgtayalh xlakata nitu natlawanikgoy leones.

Akxni takgatsilh 70 kata akxni xkachilinkanit kBabilonia, Ciro mapakgsina xalak Persa kamakgxtakgli nataspitparakgoy kxkachikinkan. Wantuku na tunkun tsukukgolh tlawakgoy akxni taspitkgolh kJerusalén tsukukgolh tlawakgoy xtemplo Jehová. Pero wantiku xkasitsinikgoy lakapara malakgachokgokgolh xtaskujutkan. Wa xlakata akxni xtitaxtunitta puxamatiy kata akxni xtaspitkgonit kJerusalén aku matlanikgolh templo.

Na nakatsiyaw akxni Esdras alh kJerusalén xlakata xastlan natlaway templo. Esdras tialh kJerusalén akxni xtitaxtunit 47 kata akxni xmatlanikanitta templo. Chu akxni xtitaxtunitta akgkututu kata akxni milh Esdras, Nehemías na chilh xlakata namakgtayanan nakaxtlawakan patsaps nema xlimakgstili Jerusalén nema xtalakxtlawanit. Uma XLIPULAKKITSIS nema natalichuwinan litakgatsiy 152 kata.