ANƐ o kai kaa o nu nihewi etɛ nɛ ɔmɛ a he sane hyɛ lo? Ee, mɛ ji Daniel huɛmɛ etɛ ɔmɛ nɛ a kua matsɛ ɔ niye ní ɔ yemi ɔ nɛ. Babilonbi ɔmɛ tsɛɛ mɛ Shadrak, Meshak, kɛ Abednego. Se, amlɔ nɛ ɔ hyɛ mɛ. Mɛni heje nɛ mɛɛ a kpla we si ha amaga nguaa nɛ ɔ kaa bɔnɛ nɔ tsuaa nɔ pee ɔ? Ha nɛ waa hyɛ.

Anɛ o kai mlaa amɛ nɛ Yehowa nitsɛ ngma nɛ a tsɛɛ ke Mlaa Nyɔngma amɛ lo? Kekleekle mlaa ji: ‘Ko ja mawu kpa ko ngɛ ye se.’ Nihewi nɛ ɔmɛ ngɛ foni ɔ mi ngɛ mlaa nɛ ɔ nɔ yee, e ngɛ mi kaa enɛ ɔ pi nɔ́ ko nɛ ngɛ gbɔjɔɔ mohu.

Nebukadnezar nɛ ji Babilon matsɛ ɔ tsɛ nimli nguanguahi fuu kɛ ba konɛ a ba wo amaga nɛ e puɛ kɛ ma si ɔ hɛ mi nyami. E de ni ɔmɛ tsuo ke: ‘Ke nyɛ nu bɛhi, kɛ sankuhi kɛ miɛ slɔɔtohi a pɛmi ɔ, nyɛ kpla si nɛ nyɛ ja sika tsu amaga a. Nɔ tsuaa nɔ nɛ be si kplae nɛ e ma ja sika tsu amaga a, a ma sake lɛ kɛ wo flɔnɔɔ kɛ mi la nɛ ngɛ tsoe gegeege ɔ mi nɔuu.’

Benɛ Nebukadnezar nu kaa Shadrak, Meshak kɛ Abednego kpla we si ha e we amaga a, e mi mi fu wawɛɛ. E ha nɛ a ya ngɔ mɛ kɛ ba e ngɔ. Nɛ e ha mɛ he blɔ ekohu kaa a kpla si nɛ a ja amaga a. Se nihewi ɔmɛ ngɔ a he kɛ fɔ Yehowa nɔ. A de Nebukadnezar ke: ‘Wa Mawu nɛ wa ngɛ sɔmɔe ɔ ma nyɛ ma kpɔ wɔ. Se ke e kpɔ we wɔ po ɔ, wa be si kplae ha o sika tsu amaga a.’

Benɛ Nebukadnezar nu munyu nɛ ɔ, e mi mi fu pe kekle ɔ po. Flɔnɔɔ kɛ mi la ngɛ lejɛ ɔ, nɛ e fã ke: ‘Nyɛ ha nɛ flɔnɔɔ ɔ mi nɛ dɔ la pe bɔnɛ e ngɛ ɔ si kpaago!’ Kɛkɛ nɛ e ha e tabuli nɛ a he wa saminya nu Shadrak, Meshak, kɛ Abednego nɛ a fĩ mɛ nɛ a sake mɛ kɛ wo flɔnɔɔ kɛ mi la nɛ ngɛ tsoe ɔ mi. Bɔnɛ la a nya wa ha heje ɔ, la lilɛ ɔ gbe nyumu ɔmɛ nɛ sake nihewi ɔmɛ wo mi ɔ. Se nihewi etɛ ɔmɛ nɛ a sake mɛ wo la a mi ɔ lɛɛ mɛni pee mɛ?

Saii mi ɔ, matsɛ ɔ ya hyɛ flɔnɔɔ ɔ mi nɛ e ye gbeye wawɛɛ. E bi ke: ‘Anɛ pi nihi etɛ nɛ wa fi ngɔ wo flɔnɔɔ kɛ mi la nɛ ngɛ tsoe ɔ mi lo?’

E tsɔli ɔmɛ he nɔ ke: ‘Ee, nihi etɛ nɛ wa kɛ wo mi.’

Nebukadnezar de ke: ‘I na nimli eywiɛ nɛ a ngɛ nyɛɛe ngɛ la a mi. A fĩ we mɛ, nɛ la a hu sɛ̃ mɛ. Nɛ nɔ nɛ ji eywiɛne ɔ ngɛ kaa mawu ko.’ Matsɛ ɔ ya su flɔnɔɔ he haa nɛ e kpa ngmlaa ke: ‘Shadrak! Meshak! Abednego! Nyɛ Hiɔwo Lokoo Mawu ɔ sɔmɔli, nyɛɛ je kpo!’

Benɛ a je kpo ɔ, nɔ tsuaa nɔ na kaa nɔ́ ko pee we mɛ. Kɛkɛ nɛ matsɛ ɔ de ke: ‘Á je Shadrak, Meshak, kɛ Abednego Mawu ɔ yi daa! E tsɔ e bɔfo nɛ e ba kpɔ mɛ ejakaa a kua mawu kpa ko jami pe lɛ pɛ.’

Anɛ enɛ ɔ pi anɔkuale yemi kɛ ha Yehowa he nɔhyɛ nɔ́ kpakpa nɛ e sa kaa wa nyɛɛ se lo?