NAHINUMDOM ka ba niining tulo ka batan-ong lalaki? Oo, sila ang mga higala ni Daniel nga midumili sa pagkaon sa lamiang pagkaon sa hari. Sila ginganlan Sadrach, Mesach ug Abednego. Apan tan-awa sila karon. Nganong wala sila moyukbo niining dakong larawan sama sa gibuhat sa uban? Atong susihon ang hinungdan.

Nahinumdom ka ba sa nabasahan sa Napulo ka Sugo? Kini mao ang mga balaod nga gisulat mismo ni Jehova. Ang una niini mao: ‘Dili ka magsimba sa bisan unsang ubang mga diyos gawas kanako.’ Ang batan-ong mga lalaki dinhi nagsugot niining balaora. Kini dili masayon alang kanila.

Si Nabucodonosor ang nagpatindog niining larawana. Siya bag-o lang nakaingon ngadto sa katawhan: ‘Kon makabati kamo sa tingog sa trompeta, mga alpa ug uban pang mga tulunggon, mohapa kamo ug mosimba niining bulawang larawan. Si bisan kinsa nga dili mohapa ug mosimba igatambog ngadto sa hudno nga nagdilaab sa kalayo.’

Si Nabucodonosor nasuko sa pagkabati nga si Sadrach, Mesach ug Abednego wala moyukbo sa larawan. Iyang gipadala sila sa atubangan niya ug gihatagan sila sa laing higayon sa paghapa. Apan ang batan-ong mga lalaki misalig kang Jehova. Sa gihapon sila midumili sa paghapa sa larawan ug sa pagsupak sa balaod sa Diyos.

Dinhi niini, labi pang nasuko si Nabucodonosor. Adunay usa ka hudnohan sa duol ug siya nagsugo: ‘Inita ang hudnohan sa makapito ka pilo ang kainit kay sa una!’ Unya iyang gipagapos ang tulo ka batan-ong lalaki sa iyang kinakusgang mga tawo sa iyang kasundalohan ug gipatambog sila ngadto sa hudnohan. Ang hudnohan labihan kainit nga ang kusgang mga lalaki napatay sa dinilaab. Apan unsa na man ang mahitungod sa tulo ka batan-ong lalaki kinsa ilang gitambog?

Ang hari mitan-aw ngadto sa hudnohan, ug nalisang sa labihan gayod. Iyang nakita ang upat ka lalaki nga naglakaw sa dilaab, bisan tulo lamang ang gitambog. Wala na sila gaposa, ug ang kalayo wala magpaig kanila. Ug ang ikaupat daw sama sa usa ka diyos! Busa ang hari mipaduol sa baba sa hudnohan, ug mitawag: ‘Sadrach! Mesach! Abednego! Gawas kamo, kamong mga alagad sa Labing Hataas nga Diyos!’

Sa dihang sila nanggula, ang tanan nakakita nga sila wala masunog. Ang hari miingon: ‘Pasagdi ang Diyos ni Sadrach, Mesach ug Abednego madayeg. Iyang gipadala ang iyang manulunda ug nagluwas kanila tungod kay sila dili mosimba sa bisan unsang diyos gawas sa ilang kaugalingon.’

Dili ba kini usa ka maayong panig-ingnan sa pagkamatinumanon alang kanato nga pagasundon?