¿BE EBINSAE we sabbingan warbaagwadsig be durdasadi? Daniel e aimala, mas nued gusulid abin obadsamaladi. Babilonia dorgan we masmala bimala Sadrac, Mesac geb Abednego. Auggi, emisgindi be daggena. ¿Ibigala wemar dina bamalad yobi, dulludullu gunanasuli ibmar sobaled dummad asabini? Anmar daggoena ibigardibe.

¿Be ebinsae Jehová na igarmar narmasgusadi, Igar Sogambegidye bilemaladi? Gebe nodedgi soge: ‘Mer babdummad bamaladse be gormalo, unnila ansebii’. We sabbingan we igar soged bali imagnanai, anba we ibmar imaggedi ibigwensur gusuli inigwale.

Nabucodonosor, Babilonia e rey gumaidi, buggidar dule dummagan gudimaladse godsa, e ibmar sobsad odummogega. Emisgi, bela dulemar anbaggunonimalad gala sogsa: ‘Garmar goled iddoarmalale, arpa, geb bamalad garmala, we or sobar gwissid asabinni be sindigar sigmalo. Dule sindigar sigsulile geb we ibmar sega gorsurbalile, madu yoed diobbisur siid yabali yog meddelegar guoe’.

Nabucodonosor iddoargua Sadrac, Mesac geb Abednego sindigar sigwissurmarye, nue saeiddoali. Imasa, e sega sedamaladi. Gannar ega sogsa bali ibu imagmalad abelege. Auggi sabbingan Jehová bensurmala. Sogmala: ‘Anmar Babdummad gala anmar arbadimaladi nabir anmar bendagged. Auggine, anba anmar bendagsulile, anmar dina be or sobar gwissid asabinni sindigar sigosuli’.

Deyob sogmala Nabucodonosor iddoargua, agga bur bule saeiddoali. Madu yoed iddaggasaar sii, geb Nabucodonosor soge: ‘¡Madu yoed soo gaddig ogannomalo, ilagugle wilub bur bule idualed bali!’. Degiidgi imasa, e soldadomar bur yeer gangumaladi, Sadrac edinmalaga geb Mesac, Abednego, geb madu yoed diobbisur siid yabali meddemala gala. Madu yoed belabela diobbisuli sii, degsoggu we dulemar yeer gangumalad burgwismala, soogi warmagdabmargua. Auggi ¿sabbingan warbaagwaddina, yabali meddelesmalad, adi igi gudmala?

Degiidgi, madu yoed siidyab rey addagnadgua, dummad gwaggisa. Rey egissali: ‘¿Anmar dulemar warbaa edidsasursi, madu yoed diobbisur siid yabali anmar meddesursi?’.

E maigan ega sogmala: ‘Eye, anmar deyob imasa’.

Geb rey sogdebali: ‘Auggi, andi dulemar warbagge soo abargi gudii dagged. Addinnarsurmala, geb gwen aggar soo abinni gusurmala. Degine, wargwendi ángel yobi daglege’. Geb madu yoed wagagse rey waligga addagnade, geb binnasur godde: ‘¡Sadrac! ¡Mesac! ¡Abednego! ¡Be nodamala, bemar Babdummad Bur Dummad gued e maigan gumalad!’.

Noarmargu, bela dulemar dagsamala gwen aggar gussurmala. Geb rey soggali: ‘¡Sadrac, Mesac geb Abednego Babdummad, e nug odummolegedi! Na e ángel barmiali geb we sabbingan bendasa, ar ibmar soggwensaale wemar sindigar sigega imassulid bali. Unnila na e Babdummad asabinni sindigar sigdimala’.

We sabbingan weyob ibmar imasmaladi, ¿anmar ogannosur be binsae, Jehová bali inniggigwadba nanaedgi?