NTE AFO emeti okopde aban̄a n̄kparawa ita emi? Ih, mmọ ẹdi mme ufan Daniel emi ẹkesịnde ndidia se mikọfọnke inọ mmọ. Mbon Babylon ẹkekot mmọ Shaʹdrach, Meʹshach ye A·bedʹne·go. Edi se mmọ ke emi. Ntak mmọ minuhọke inọ akwa mbiet emi nte ofụri owo eken? Yak idun̄ọde ifiọk.

Nte emeti mme ibet oro Jehovah ke idemesie ekewetde ẹkotde Ibet Duop? Akpa ke otu mmọ ẹmi edi: ‘Afo unyeneke ndikpono abasi efen n̄kan mi.’ N̄kparawa oro mi ke ẹkop uyo ẹnọ ibet emi, okposụk edi mimemke ndinam.

Neb·u·chad·nezʹzar, edidem Babylon, okot ediwak ikpọ owo ndikpono mbiet emi enye owụkde. Enye okụre ndidọhọ kpukpru owo ndo ndo oro, ete: ‘Ke mbufo ẹkopde uyo obukpon̄ ye harp ye ikwọ ndido, ana mbufo ẹtuak ibuot ẹkpono mbiet o-gold emi. Owo ekededi eke minuhọke ituak ibuot, ẹyetop ẹsịn ke akwa ikan̄ eke asakde iwiwa.’

Ke Neb·u·chad·nezʹzar ọfiọkde ete Shaʹdrach, Meʹshach ye A·bedʹne·go inuhọke, esịt otịm ayat enye. Enye ọdọn̄ ẹda mmọ ẹsọk enye. Enye ọnọ mmọ ifet efen ndinuhọ. Edi n̄kparawa ẹmi ẹbuọt idem ke Jehovah. Mmọ ẹsian Neb·u·chad·nezʹzar, ‘Abasi nnyịn emi nnyịn ikponode emekeme ndinyan̄a nnyịn.’ Edi idem ke enye minyan̄ake, nnyịn idinuhọke inọ mbiet o-gold fo.’

Ke okopde emi, Neb·u·chad·nezʹzar otịm ayat esịt akan. Akwa ikan̄ odu ekpere ndien enye owụk ete: ‘Ẹnam akwa ikan̄ ofiop utịm ikatiaba akan nte ekedide mbemiso!’ Do enye anam ata n̄kpọsọn̄ mbon ekọn̄ esie ẹbọp Shaʹdrach, Meʹshach ye A·bedʹne·go ẹnyụn̄ ẹtop mmọ ẹsịn ke akwa ikan̄. Akwa ikan̄ otịm ofiop tutu edemeikan̄ owot n̄kpọsọn̄ owo ẹmi. Edi nso kaban̄a n̄kparawa ita ẹmi mmọ ẹtopde ẹsịn?

Edidem ese esịt akwa ikan̄, ndien ndịk otịm anam enye. Enye obụp, ‘Nte nnyịn ikọbọpke owo ita itop isịn ke akwa ikan̄?’

Ifụn esie ẹbọrọ ẹte ‘Edi ntre.’

Enye ete, ‘Edi mmokụt owo inan̄ ẹsan̄ade ke ikan̄ oro.’ ‘Ibọpke mmọ, ndien ikan̄ itaha mmọ. Ndien ọyọhọ inan̄ ebiet abasi.’ Edidem otịm asan̄a ekpere inua otop akwa ikan̄ onyụn̄ okot: ‘Shaʹdrach! Meʹshach! A·bedʹne·go! Ẹwọrọ ẹdi, mbufo ikọt Abasi Ata Edikon̄!’

Ke mmọ ẹwọrọde edi, kpukpru owo ẹkeme ndikụt ẹte n̄kpọ inamke mmọ. Edidem ọdọhọ ete: ‘Ẹtoro Abasi Shaʹdrach, Meʹshach ye A·bedʹne·go! Enye ọdọn̄ angel esie ẹdinyan̄a mmọ koro mmọ midinuhọke ituak ibuot inọ abasi efen ikan eke mmọ.’

Nte emi idighe eti uwụtn̄kpọ edinam akpanikọ nnọ Jehovah inọ nnyịn ndikpebe?