O SE nanumi iratou tiko na tolu na cauravou oqo? Io, eratou itokani i Taniela. Eratou a vakuai iratou ena so na kakana me ratou bulabula vinaka kina. Era vakayacani iratou na Papiloni me o Setareki, Mesaki, kei Apetiniko. Raici iratou mada. Na cava eratou sega ni cuva kina ina matakau vakaitamera me vakataki ira na kena vo? Meda raica mada.

O se nanuma tiko na lawa a vola sara ga o Jiova, e vakatokai na iVunau e Tini? Na kena imatai oqo: ‘Mo kua sara ni qarava e dua na kalou tani, o yau duadua ga.’ Eratou talairawarawa ina lawa oya na cauravou oqo, dina ni sega ni ka rawarawa vei iratou.

E kacivi ira mai e levu na turaga o Nepukanesa na tui Papiloni mera vakarokoroko ina matakau a vakaduria. E se qai kaya oti ga vei ira na lewenivanua: ‘Ni dou sa rogoca na davui kei na api kei na ivakatagi, dou cuva ena vakarokoroko ina matakau koula. Ke sega ni dua e cuva ena biu sara ga ina lovo bukawaqa.’

E vakacudrui Nepukanesa ni ratou sega ni cuva ina matakau o Setareki, Mesaki, kei Apetiniko. E vakarota me ratou kau yani vua, qai solia tale e dua na gauna me ratou na vakarokoroko kina ina matakau. Ia eratou nuitaki Jiova ga. Ratou kaya vei Nepukanesa: ‘Na Kalou keitou qarava ena rawa ni vakabulai keitou. Ia, ke na sega mada ga ni vakabulai keitou, keitou na sega ga ni cuva ina nomuni matakau koula.’

Ni rogoca oqo o Nepukanesa, sa qai cudru ga vakalevu. E vakarota: ‘Me vakavitutaki na katakata ni lovo bukawaqa!’ Sa ra qai vesuki iratou na nona sotia kaukaua me ratou kolotaki yani ina lovo. Ni sivia na kena katakata era bau mate e so na vakaitavi ena nodratou kolotaki yani. Ia vakacava o iratou na kolotaki yani ina lovo bukawaqa?

Ni rai yani na tui e loma ni lovo, e rere vakalevu qai taroga: ‘Eda a sega li ni vesuka e le tolu qai kolotaki iratou yani ina lovo?’

Era sauma na nona dauveiqaravi: ‘Io, kemuni na tui.’

E kuria: ‘Au sa raica tu oqo ni ratou sa le va na veilakoyaki voli ena loma ni bukawaqa. Sa tasere na kedratou ivesu, qai sega ni dua vei iratou e kama. Ia na kedratou ikava e vaka na kalou.’ E toro voleka yani ina lovo bukawaqa na tui qai kaci: ‘Setareki! Mesaki! Apetiniko! Dou lako mai, o kemudou na tamata ni Kalou Cecere Sara!’

Ni ratou sa lako mai tuba era vakadinadinataka na tiko e kea ni ratou sega dina ni kama. Sa qai kaya na tui: ‘Me rokovi na Kalou i Setareki, Mesaki, kei Apetiniko! Ni a tala mai nona agilosi me vakabulai iratou ni ratou sega ni cuva ina dua tale na kalou, eratou qaravi koya tiko ga ena yalodina.’

Eratou ivakaraitaki vinaka dina vei keda. Meda vakatotomuri iratou ena nodratou yalodina tiko ga vei Jiova.