NEMANDUʼÁPA rehendumahague koʼã mbohapy mitãrusúgui? Heẽ, koʼãva Daniel amigokuéra ndoʼuseivaʼekue pe tembiʼu naiporãiva chupekuéra g̃uarã. Umi Babiloniaygua ohenói chupekuéra Sadrac, Mesac ha Abednego. Péro emañami hesekuéra koʼág̃a. Mbaʼére piko ndojayvýi ko taʼanga guasu renondépe enterove ojapoháicha? Jahechami mbaʼérepa oikohína ko mbaʼe.

Nemanduʼápa pe léi Jehová voi oskrivivaʼekue, hérava Diez Mandamientos? Pe primero heʼi: ‘Ani readora ótro dióspe, síno chéve añoite’. Koʼã mitãrusu ojapohína ko léi heʼíva, hasýrõ jepe upéva.

Nabucodonosor, Babiloniaygua rréi, ohenói heta hénte iñimportántevape omombaʼeguasu hag̃ua ko taʼanga haʼe omopuʼãvaʼekuépe. Heʼiramoite enterovépe: ‘Pehendúvo ipu umi turu, arpakuéra ha opaichagua instruménto, pejayvy ha peadora ko taʼanga oroguigua. Pe ndojayvýiva oadora hag̃ua ojeitýta upepete voi peteĩ tatakua akúpe’.

Oikuaávo Nabucodonosor Sadrac, Mesac ha Abednego ndojayvyiha ipochyeterei. Nabucodonosor heʼi ojegueru hag̃ua chupekuéra hendápe. Upépe heʼi jey umi mitãrusúpe ojayvy hag̃ua. Péro haʼekuéra ojerovia Jehováre. ‘Ore Dios roservíva ikatu oresalva’, heʼi chupe hikuái. ‘Péro ndaoresalváiramo jepe, ndorojayvymoʼãi pe taʼanga oroguigua renondépe.’

Ohendúvo ko mbaʼe, Nabucodonosor ipochyvéntema. Hiʼag̃ui upégui peteĩ tatakua, ha Nabucodonosor heʼi: ‘Pembyakuve pe tatakua siete vése oĩvaʼekuégui!’. Upémaramo heʼi umi kuimbaʼe ijehersitopegua imbaretevévape oñapytĩ hag̃ua Sadrac, Mesac ha Abednégope ha opoi pe tatakuápe. Hakuetereígui pe tatakua, pe tatarendy ojuka umi kuimbaʼe imbaretévape. Péro mbaʼépa ojehu umi mitãrusúpe oityvaʼekue hikuái pe tatakuápe?

Pe rréi omaña tatakua ryepýpe, ha oñemondyieterei. ‘Ñañapytĩkuri mbohapy kuimbaʼe ha japoi pe tatakua akúpe, ajépa?’, oporandu:

‘Heẽ, upéva rojapo’, heʼi isiervokuéra.

‘Péro che ahecha cuatro kuimbaʼe oguatáva pe tatápe’, heʼi haʼe. ‘Noñeñapytĩri hikuái, ha pe tata ndojapói hesekuéra mbaʼeve. Ha pe cuatroha haʼete peteĩ diós.’ Pe rréi oñemoag̃ui tatakua rokẽme ha osapukái: ‘Sadrac! Mesac! Abednego! Pesẽ, peẽ pe Ñandejára Ijyvatevéva siervokuéra!’.

Osẽvo hikuái, enterove ohecha ndoikoihague hesekuéra mbaʼeve ivaíva. Upémaramo pe rréi heʼi: ‘Toñemombaʼeguasu pe Sadrac, Mesac ha Abednego Ñandejára! Haʼe ombou hiʼánhel ha osalva chupekuéra pórke ndaipóri mbaʼeve ombojayvýva chupekuéra oadora hag̃ua ótro diós ndahaʼéiva haʼekuéra oadoráva’.

Ajépa upéva ohechauka porã ñandéve mbaʼéichapa jahechaukavaʼerã fidelida Jehovápe?