Kukwe kira 77

Ñaka mikani täte kwetre

¿MONSO nimä ne kädrie tärä mä olote? Ye ja ketamuko Danielkwe, käkwe ñaka mrö käme kräketre ye kwetani. Nitre Babilonia kädekani Sadrac, Mesac bätä Abednego. Akwa mike ñärärä nengwane. ¿Ñobätä ñaka ja mikete kuintubu jondron üai sribebare ye känenkri nitre mräkä ye erere? Ani mike gare jai.

¿Jehová kukwe tikani akwle kädekata Kukwe Keta Jätä, ye törö mäi? Kena tä niere: ‘Munkwe ñaka ngöbö mada mika täte.’ Monsotre tä kukwe ye mike täte nete, kukwe ye ñan nuäre akwa tä nuainne.

Nabucodonosor, rei Babilonia, käkwe nitre kwati ütiäte kri käräbare jondron üai sribebare kwe ye mike täte. Niebare kwe nitre ie: ‘Nibi krotu, arpa, bätä jondron mada ye ngö mikai angwane, munkwe ja mikate kuintubu jondron üai orore ye mikakäre ngöböre jai. Nire käkwe ñaka nuaindi ye kitai ñukwä jutra ngitiekä yete.’

Sadrac, Mesac bätä Abednego ñaka ja mikaninte kuintubu ye namani gare Nabucodonosor ie angwane, namani rubun krubäte. Ni juani kwe niaratre kärere. Nabucodonosor ja töi mikaninta niaratre töimike ja mikete kuintubu. Akwa monsotre ye käkwe tö ngwani Jehovai. ‘Ngöbö mikata täte nunkwe raba nun mike kwäre,’ niebare kwetre ie. ‘Yebätä nunkwe ñaka ja mikaite kuintubu jondron üai orore mäkwe ye ie.’

Ye niebare kwetre aune, Nabucodonosor namani bäri rubun. Kä sribebare ñukwäkrä nämene känime, aune niebare kwe: ‘¡Ñukwä ye mike ngire bä kükü bäri käne yekrä!’ Biti nitre rükä kwe bäri dite juani kwe Sadrac, Mesac bätä Abednego kise dike aune kite ñukwä ngire yete. Ñukwä ye namani ngire krubäte yebätä nitre dite ye kämikani kwe. Akwa ¿monsotre nimä kitani ñukwäte yebätä dre namani bare?

Rei nikrabare ñukwäte, aune nikaninkä krubäte. ‘Nikwe nitre nimä kise diri biti kiti ñukwäte, ¿ñan ererea?’ ngwanintari kwe.

‘Jän, ye erere nikwe nunie,’ nitre sribikä kräke käkwe niebare.

‘Akwa nitre nibokä tuin tie näin ñukwäte ta,’ niebare kwe. ‘Kise ñaka tä mäkäni, aune niaratre ñaka nukwe jire. Nibokäkäre ye ngöbö bä kwrere.’ Rei nikani jukwe ye ken ñukwä yekänti aune ñäkäbare kwe ja dibiti: ‘¡Sadrac! ¡Mesac! ¡Abednego! Nitre Ngöbö Kri kä kwinbiti mikaka täte, näin jubäre!’

Jatani kä mrebiti angwane, ñaka nukwani jire jutuabare nitre jökrä ie. Yebätä rei niebare, ‘¡Sadrac, Mesac bätä Abednego Ngöböi ye käikitadrekä! Niara ángel kwe juani aune mikani kwäre kwe, ñaka ja mikaninte kuintubu kwetre ngöbö mada mikakäre täte yebätä.’

Ngöbö mikadre metre täte ye bämikani kwin krubäte kwe nikrä, ¿ñan ererea?

Éxodo 20:3; Daniel 3:1-30.