WE NŨŨLILIKANA ũyĩw’a ngewa ya anake aa atatũ? Ĩĩ, aa nĩ anyanyae ma Ndanieli ala maleile kũya lĩu mataaĩlĩtwe nĩkũya. Ambaviloni mametaa Satalaki, Mesaki na Aveti-neko. Ĩndĩ kwasisya yu. Nĩkĩ mateũkumanĩa mũvw’anano ũũ o tondũ andũ ala angĩ onthe mekwĩka? Ekai twone.

We nũũlilikana mĩao ĩla Yeova waandĩkie we mwene yĩtawa Mĩao Ĩkũmi? Ũla wa mbee wayo nĩ: ‘Ndũkaathaithe ngai ingĩ o na syĩva ate o nyie.’ Anake aa me vaa maatĩĩe mwĩao ũsu, o na kau ti ũndũ ũvũthũ kwĩka ũu.

Nevukatilesa, mũsumbĩ wa Mbaviloni nĩweetie andũ aingĩ anene moke kũnenga ndaĩa mũvw’anano ũũ waũngamĩtye. Nake aĩ anamina kũtavya andũ onthe ũũ: ‘Mweew’a wasya wa soo na mbeve, na wa mĩthemba ĩngĩ ya mbeve syĩ mawasya, valũkai nthĩ na kũthaitha mũvw’anano ũũ wa thaavu. Na ũla ũteũvalũka na kũũthaitha nũkwĩkw’a ikonĩ yĩ mwaki mwakanu vau kwa vau.’

Yĩla Nevukatilesa weewie kana Satalaki, Mesaki, na Aveti-neko nĩmalea kũvalũka nthĩ mathaithe, athilĩka mũno. Na atũmana maetwe vala ũĩ. Nake amanenga mwanya ũngĩ wa kũvalũka nthĩ mathaithe. Ĩndĩ anake asu nĩmamũĩkĩĩe Yeova. Namo mamwĩa: ‘Ngai witũ ũla tũthũkũmaa nũtonya kũtũtangĩĩa ithyĩ. Ĩndĩ o na ethĩwa ndetũtangĩĩa, tũikavalũka nthĩ tũthaithe mũvw’anano waku wa thaavu.’

Yĩla weewie ũu, Nevukatilesa athilĩka ĩndĩ vyũ. Vaĩ iko ĩnene o vau vakuvĩ, nake asya: ‘Ĩkĩai iko mwaki kũndũ mũonza mbee wa ũndũ yĩkothaa kwĩkĩwa!’ Na eea aũme ala me vinya vyũ ma ita syake move Satalaki, Mesaki, na Aveti-neko na maimekya ikonĩ yĩu yĩ mwaki. Iko yĩu yaĩ na mwaki mwingĩ mũno nginya aũme asu me vinya mooawa nĩ itw’ĩki sya w’o. Ĩndĩ kweethĩiwe ata kwa ala anake mamekisye mwakinĩ?

Yĩla Mũsumbĩ wasiisye ikonĩ nthĩnĩ, nĩwakĩie mũno. Na akũlya: ‘Tũinekya andũ atatũ me ove ikonĩ yĩĩ yĩ mwaki wakanĩte?’

Namo athũkũmi make masũngĩa: ‘Ĩĩ, nĩw’o tweeka.’

Nake asya: ‘Ĩndĩ nyie nĩona andũ ana maikinyĩla mwakinĩ. Nĩathasye, na mwaki ndũũmeka ũndũ. Na mũvw’ano wa ũsu wa kana nĩ ta wa ngai.’ Nake mũsumbĩ athi vakuvĩ na mũomo wa iko na aneena na wasya mũnene ayasya: ‘Satalaki! Mesaki! Aveti-neko! Umaalai mũke kũũ, inyw’ĩ athũkũmi ma Ngai Ũla Wĩ Ĩũlũ wa Onthe.’

Na maumaala, kĩla mũndũ oona kana mwaki ndũnameka ũndũ. Nake mũsumbĩ asya: ‘Ngai wa Satalaki, Mesaki, na Aveti-neko nataĩwe! Nĩwatũma mũlaĩka wake na amatangĩĩa nũndũ nĩmaleile kũvalũka nthĩ na kũthaitha ngai o na yĩva ateo ngai woo ene.’

Ĩno yo tyo ngelekany’o nzeo ya kũmũĩkĩĩa Yeova twaĩlĩtwe nĩkũmĩatĩĩa?

Kuma 20:3; Ndanieli 3:1-30.