ANIHEBʼ li wankebʼ saʼ li eetalil? Aʼanebʼ li ramiiw laj Daniel li inkʼaʼ keʼraj xtzakankil li wank saʼ xmeex li awabʼej. Ebʼ laj Babilonia keʼxkʼe choʼq aj Sadrac, aj Mesac ut aj Abednego li xkʼabʼaʼebʼ li saaj al. Qilaq, kʼaʼut naq inkʼaʼ yookebʼ xwiqʼibʼankil ribʼ chiru li pechʼbʼil yos joʼ yook xbʼaanunkil li tenamit?

Ma jultik aawe li lajeebʼ chi chaqʼrabʼ li kixtzʼiibʼa chaq li Yos? Li xbʼeen chaqʼrabʼ naxye: ‹Maaloqʼoni jalan chik yos chiwu laaʼin›. Usta chʼaʼaj xbʼaanunkil li chaqʼrabʼ aʼin. Abʼan ebʼ li saaj al yookebʼ xpaabʼankil.

Laj Nabucodonosor kixbʼoqebʼ li wankebʼ xwankil re naq teʼxloqʼoni li pechʼbʼil yos li kixyiibʼ, ut kixye rehebʼ: ‹Naq teerabʼi xyaabʼ li xukubʼ, li aarp ut chixjunilebʼ chik li wajbʼ, teewiqʼibʼ eeribʼ chiru li pechʼbʼil yos re oor. Li ani inkʼaʼ tixbʼaanu aʼin tkuteʼq saʼ xaml›.

Laj Nabucodonosor kichalk xjosqʼil naq kirabʼi naq laj Sadrac, laj Mesac ut laj Abednego inkʼaʼ keʼxwiqʼibʼ ribʼ chiru li pechʼbʼil yos. Joʼkan naq kixtaqla xbʼoqbʼalebʼ ut kixye rehebʼ naq teʼxwiqʼibʼ ribʼ chiru li jalam u. Abʼan ebʼ li saaj al keʼxye re laj Nabucodonosor: ‹Li Yos li naqaloqʼoni ru tooxkol. Usta inkʼaʼ tooxkol chʼolchʼo naq inkʼaʼ tqaloqʼoni ru li pechʼbʼil yos re oor›.

Naq laj Nabucodonosor kirabʼi aʼin kinumtaak xjosqʼil, joʼkan naq kixye: ‹Kʼemaq wuqubʼ sut xtiqwal li xaml!› Ut kixtaqla ebʼ laj puubʼ li qʼaxal kawebʼ ribʼ re naq teʼxbʼakʼ laj Sadrac, laj Mesac ut laj Abednego ut teʼxkut saʼ xaml. Ebʼ li winq, li kawebʼ ribʼ, keʼkamk xbʼaan naq kʼajoʼ xtiqwal xnaʼaj li xaml. Abʼan, kʼaru keʼxkʼul eb li oxibʼ chi saaj al naq keʼkuteʼk saʼ xaml?

Laj Nabucodonosor kʼajoʼ naq kixuwak naq kiʼilok saʼ xnaʼaj li xaml ut kixye: ‹Ma inkʼaʼ tabʼiʼ oxibʼ chi winq xeebʼakʼ ut xeekutebʼ saʼ xaml?›

Ebʼ li xmoos li awabʼej keʼxye: ‹Joʼkan xqabʼaanu!›

Abʼan laj Nabucodonosor kixye: ‹Yookin chi rilbʼal naq kaahibʼ chi winq yookebʼ chi bʼeek saʼ xaml. Moko bʼakʼbʼookebʼ ta ut inkʼaʼ nekeʼkʼatk, li xka winq chanchan jun li anjel›. Tojaʼ naq li awabʼej kijilok chire li xaml ut kixye: ‹Sadrac, Mesac ut Abednego, ex aj kʼanjel chiru li Nimajwal Yos, elenqex chaq saʼ li xaml!›

Naq ebʼ li saaj al keʼelk chaq saʼ li xaml, chixjunilebʼ keʼxkʼe reetal naq maakʼaʼ keʼxkʼul. Tojaʼ naq li awabʼej kixye: ‹Loqʼoninbʼilaq taxaq li xYos laj Sadrac, laj Mesac ut laj Abednego! Li Yos kixtaqla li xʼanjel re xkolbʼalebʼ xbʼaan naq inkʼaʼ keʼxwiqʼibʼ ribʼ chiru maajun rehebʼ li pechʼbʼil yos›.

Li keʼxbʼaanu ebʼ li saaj al aʼin, aʼan jun chaabʼil eetalil choʼq qe re naq junelik tiikaq qachʼool chiru li Jehobʼa.