NĨŨRARIRIKANA ũkĩigua ũhoro wa aanake aya atatũ? Ĩĩni, nĩ arata a Danieli arĩa maaregire kũrĩa irio iria itaarĩ njega harĩ o. Ababuloni maametaga Shadraka, Meshaka na Abedinego. No ĩndĩ ta marore rĩu. Nĩkĩ kĩragiria mainamĩrĩre mũhianano ũyũ mũnene mũno ta andũ arĩa angĩ? Ta reke tuone.

Nĩ ũraririkana maathani marĩa Jehova we mwene aandĩkire meetagwo Maathani Ikũmi? Rĩa mbere rĩa macio rĩarĩ: ‘Ndũkanagĩe na ngai ĩngĩ tiga niĩ.’ Aanake aya haha nĩ marathĩkĩra watho ũcio, o na gũtuĩka ti ũndũ mũhũthũ gwĩka ũguo.

Nebukadinezaru, mũthamaki wa Babuloni, eetĩte anene aingĩ a bata marugũrie mũhianano ũcio ahandithĩtie. No hĩndĩ aarĩkia kwĩra andũ othe atĩrĩ: ‘Rĩrĩa mũkaigua mĩgambo ya karumbeta, na mũtũrirũ na kĩnanda kĩrĩa kĩnene kĩa mũgeto, na inanda cia mĩthemba yothe-rĩ, mũkegũithia thĩ mũhoe mũhianano ũyũ wa thahabu. Ningĩ mũndũ o wothe ũtakegũithia thĩ aũhoe agaikio icua-inĩ rĩa mwaki wakanĩte mũno.’

Rĩrĩa Nebukadinezaru aamenyire atĩ Shadraka, Meshaka na Abedinego matiainamĩrĩire thĩ, akĩrakara mũno. Akiuga matwarũo kũrĩ we. Akĩmahe mweke ũngĩ wa kũinamĩrĩra thĩ. No aanake acio mehokire Jehova biũ. Makĩĩra Nebukadinezaru atĩrĩ: ‘Ngai witũ o we ũrĩa tũtungatagĩra aahota gũtũhonokia. No rĩrĩ, o na kũngĩkorũo ti ũguo-rĩ, kĩmenye atĩ gũtirĩ hingo tũngĩinamĩrĩra mũhianano ũcio waku wa thahabu.’

Hĩndĩ ĩo Nebukadinezaru akĩgwatwo nĩ mang’ũrĩka. Nĩ haarĩ icua rĩa mwaki hakuhĩ, kwoguo agĩathana atĩrĩ: ‘Icua rĩu rĩongererũo ngũ maita mũgwanja gũkĩra ũrĩa ũhũthĩire gwakana!’ Na ningĩ agĩatha andũ a ita rĩake arĩa maarĩ njamba akĩmera manyite Shadraka, Meshaka na Abedinego mamohe na mamaikie icua-inĩ rĩu rĩa mwaki. Mwaki ũcio waarĩ mũhiũ mũno ũũ atĩ nĩnĩmbĩ ciaguo ikĩũraga njamba icio. Ĩndĩ atĩa ũhoro wa aanake acio atatũ maikirio icua-inĩ?

Mũthamaki agĩikia maitho icua-inĩ rĩu, na akĩnyitwo nĩ kĩmako kĩnene. Akĩũria atĩrĩ: ‘Githĩ ti andũ atatũ tũikirie mwaki-inĩ marĩ ohe?’

Nao makĩmũcokeria atĩrĩ, ‘Ĩĩ nĩguo Mũthamaki.’

Nake akiuga ũũ, ‘Ta rorai! Nĩ andũ ana ndĩrona mwaki-inĩ, nao ti ohe, na matirĩ ũũru marekwo nĩguo. Naguo mũhianĩre wa ũcio wa kana nĩ ta wa mũrũ wa ngai.’ Nake mũthamaki agĩgĩkuhĩhĩria mũromo-inĩ wa icua rĩu agĩĩtana akiuga atĩrĩ: ‘Nĩ inyuĩ Shadraka! na Meshaka! na Abedinego!, O inyuĩ mũtungatagĩra Ngai-Ũrĩa-wĩ-Igũrũ-Mũno; umĩrai, mũũke haha!’

Rĩrĩa moumĩrire-rĩ, andũ othe makĩona atĩ matiarĩ ũũru mekĩtwo. Rĩu mũthamaki agĩkiuga: ‘Ngai wa Shadraka, Meshaka na Abedinego arogathwo! O we ũrĩa ũtũmĩte mũraika wake nĩ getha amahonokie tondũ matingĩinamĩrĩra ngai ĩngĩ mamĩhoe o tiga Ngai wao wiki tu.’

Na githĩ ũyũ ti mũhaano mwega mũno wa wĩtĩkio he Jehova wa kũrũmĩrĩrũo?