NANCHI wavuluka byo kyaambiwepo pacheche pa bano bansongwalume basatu nyi? Ee, bano bajinga balunda nanji Danyela bakaine kuja kajo kabujile kufwainwa. Bena Babilona bebatumbile’mba Shadalaka, Meshaka ne Abedenego. Pano bamone pa kikye kipikichala. Mambo ka o babujila kufukama panshi ku kino kipashañano kikatampe byonka byauba bakwabo? Twaya tumone kyalengejile.

Nanchi wavuluka mizhilo yanembele mwine Yehoba itongolwa amba Mikambizho Jikumi nyi? Mutanshi ke wa kuba’mba: ‘Kechi mukapopwele balesa bakwabo, ba kubikapo pe amiwa ne.’ Bano bansongwalume bo ubena kumona papo bakokejile uno muzhilo, nangwa kya kuba kechi kyapelele kuba ne.

Nebukaneza, mfumu wa bena Babilona, waichile babinemanga bonse kwiya na kupopwela uno lukipashañano ye aimikile. Po po apwishishetu kubula bantu amba: ‘Umvwe mwaumvwa lusengo ne mumpempe, ne kidali, ne jisense, ne kyansa, mwafwainwa kufukama panshi ne kumupopwela awa nkishi wa ngolode. Yense usakubula kufukama panshi basakumutaya mu kisha kya mujilo.’

Nebukaneza wazhingijile bingi pa kuyuka’mba ba Shadalaka, Meshaka ne Abedenego, kechi bafukamine panshi ne. Wakambizhe kwibaleta kwi aye. Wibapele kimye kya kufukama panshi. Bino bano bansongwalume baketekejile mwi Yehoba. Bamwambijile Nebukaneza amba, ‘Lesa wetu ye twingijila usakwitupulusha. Bino nangwa wabula kwitupokolola, kechi twaswa kumupopwela awa nkishi wa ngolode ye mwaimika ne.’

Byo aumvwine bino byambo, Nebukaneza wazhingijile bingi. Kisha kya mujilo kyajingatu pepi, kepo akambizhe’mba: ‘Mutwishe kisha kya mujilo bimye bitanu na bibiji kukila pa kala!’ Kepo banabalume ba biyangala bakashile ba Shadalaka, Meshaka ne Abedenego ne kwibataya mu kisha kya mujilo. Kisha kya mujilo kyapyaine kya kuba aba banabalume babiyangala baipayilwe na lubebe lwa mujilo. Pano ki ka kyamwekejile boba bansongwalume basatu bo batayile mu mujilo?

Mfumu watajile mu kisha, kabiji waubile bingi moyo. Waipwizhe’mba: ‘Nanchi kechi twajikutayamo bantu basatu mu mujilo nenyi?’

Bakalume banji bamukumbwile’mba: “Ee mwane.”

Pano aye waambile’mba: ‘Bino amiwa namonamo bantu bana mukachi ka mujilo. Kabiji kechi bakaswa ne, ne kupya kechi bapya ne. Ne aye wa buna wamweka nobe lesa.’ Mfumu wayile kwipi na kibelo kya kisha kya mujilo ne kubijika amba: ‘Shadalaka, Meshaka ne Abedenego fumaimo anweba bakalume ba Lesa Mwine Wakila!’

Byo bafuminemo, bantu bonse bamwene’mba kafwapo nangwa pamo paji bikozha ne. Kepo mfumu aambile’mba: ‘Atotwe Lesa wa ba Shadalaka, Meshaka ne Abedenego yenka watuma malaika wanji kabiji wapokolola bakalume banji mambo kechi baswa kufukama panshi ne kupopwela lesa ungi ne, kanatu yenka Lesa wabo.’

Nanchi kino kechi kyo kya kumwenako kyawama kya kwikala bakishinka kwi Yehoba kyo twafwainwa kulondela nenyi?