YU MƐMBA we wi tɔk bɔt dɛn tri yɔŋ man ya? Dɛn na Daniɛl in padi dɛn. Na dɛn ɔl nɔ bin it di tin dɛn we di kiŋ de it. Di pipul dɛn na Babilɔn kɔl dɛn Shedrak, Mishak ɛn Abɛdnigo. Bɔt wetin mek dɛn tinap, we ɔl di ɔda pipul dɛn butu? Lɛ wi si.

Yu mɛmba di lɔ dɛn we Jiova insɛf bin rayt, we dɛn de kɔl di Tɛn Kɔmandmɛnt? Di fɔs lɔ se: ‘Na mi nɔmɔ una fɔ wɔship, una nɔ fɔ wɔship ɔda gɔd.’ Dɛn yɔŋ man ya de du wetin dis lɔ se, pan ɔl we i nɔ izi fɔ dɛn.

Kiŋ Nɛbukanɛza kɔl bɔku bigman dɛn fɔ kam wɔship di tin we i dɔn mek. I tɛl di pipul dɛn se: ‘We una yɛri dɛn blo di ɔn ɛn ple di myuzik, una fɔ butu ɛn wɔship dis tin we a dɔn mek wit gold. Ɛnibɔdi we nɔ butu ɛn wɔship dis tin, a go mek dɛn put am insay wam wam faya.’

We di myuzik bigin ple, ɔl di pipul dɛn butu ɛn wɔship di tin we Nɛbukanɛza dɔn mek. Na Shedrak, Mishak ɛn Abɛdnigo nɔmɔ nɔ butu. We Nɛbukanɛza yɛri se dɛn nɔ butu, i vɛks bad bad wan. I mek dɛn kam wit Shedrak, Mishak ɛn Abɛdnigo to am. I tɛl dɛn bak fɔ butu ɛn wɔship di tin we i dɔn mek. Bɔt di yɔŋ man dɛn abop pan Jiova. So dɛn tɛl Nɛbukanɛza se: ‘Di Gɔd we wi de sav ebul fɔ sev wi. Bɔt ilɛksɛf i nɔ sev wi, wi nɔ go butu to dis tin we yu dɔn mek wit gold.’

We Nɛbukanɛza yɛri wetin dɛn tɔk, i vɛks pas aw i bin vɛks fɔs. Wan ples usay wam wam faya kin de, bin de nia de. Kiŋ Nɛbukanɛza tɛl in savant dɛn se: ‘Una mek di faya kech gud gud wan!’ Dɔn i mek di sojaman dɛn we gɛt trɛnk pas ɔl in ɔda sojaman dɛn, tay Shedrak, Mishak ɛn Abɛdnigo ɛn put dɛn insay di wam wam faya. Bɔt bikɔs di faya wam tumɔs, di sojaman dɛn we go put dɛn insay di faya, day. Bɔt wetin apin to di tri yɔŋ man dɛn we dɛn put insay di faya?

We di kiŋ luk insay di faya, di tin we i si mek i fred bad bad wan. I aks in savant dɛn se: ‘Nɔto tri man dɛn wi tay ɛn put insay dis wam wam faya?’

In savant dɛn ansa am se: ‘Yɛs, na tri man dɛn wi tay ɛn put insay di faya.’

I se: ‘Bɔt na 4 man dɛn a de si de waka waka insay di faya. Dɛn nɔ tay ɛn di faya nɔ de du dɛn natin. Ɛn di ɔda wan fiba enjɛl.’ Di kiŋ go nia di plɛs usay di faya de ɛn ala se: ‘Shedrak, Mishak ɛn Abɛdnigo, una kɔmɔt insay di faya! Na una Gɔd de pantap ɔlman na di wan ol wɔl!’

We dɛn kɔmɔt insay di faya, ɔlman si se natin nɔ du dɛn. Dɔn di kiŋ tɔk se: ‘Lɛ ɔlman prez Shedrak, Mishak ɛn Abɛdnigo dɛn Gɔd! I sɛn in enjɛl fɔ kam sev dɛn bikɔs dɛn nɔ de wɔship ɔda gɔd.’

Shedrak, Mishak ɛn Abɛdnigo bin fetful to Jiova. Yu nɔ fil se i go fayn if wisɛf tan lɛk dɛn?