ALOONUŊ pa puaambuaa yaa wa haa? Daniɛl chaaŋaa nduaa ni. Haa ndaa kɛɛ le dio nyɛdiaa masaa ndoo ke nda wo ni. Diola Babiloniaŋnda ndaa veelu ndalaŋ aa: Sedaaki, Misiaki, a Bɛniŋgo. Kɛ tofawɔ nda vɛlɛ isisi. Le yɛɛnɛ a beŋ wulaŋ nda wanaa tuaa latulu le piɔmndo hoo sooloo le? Ŋ tofaŋndɔ le sabu koŋ.

A loonuŋ pa sawala tɔla Jɛhowa pila ndoo poonyiaa laŋ? O tasoo cho ni: ‘La sooluu mɛlɛka cheleŋ te pa, mɛɛ ya pilɛ kpe mila piɛi.’ Sawa koŋ puaambuaa yaa wa haa cho naa diikɔŋndo ni, mi che bɛɛ naa o cho suɛi bɛɛŋ bɛɛŋ le nda le.

Mi Nɛbukanɛɛsa masaa le Babilɔŋ veelu wanaa benduaa kpou o masale ndɔleŋ niŋ le hunɔɔ piɔmndo hoo biiloo. Mi wana ndɔ yondaa dimi choo choo kpeleŋ aa: ‘Masaa dimi maa te la tuei pɛ mi bululaŋ la soo, a towalaŋ vɛlɛa nyɛm chaaŋ cheleŋ, la baŋ wulaŋ piɔmndo hoo lachi mila sooluu ndu. Wana o wana beŋ wulaŋ mbo sooluu piɔmndo hoo le, wouwo ndu o yiŋnde bɛŋndeŋ niŋ.’

Mɛɛ nda kɔ dimul Nɛbukanɛɛsa maa Sedaaki, Misiaki, a Bɛniŋgo kɛɛ le wulaŋ baŋɔɔ le piɔmndo sooloo, mbo duaŋ tumbe tau. Okoŋ mbo viam waŋnda le ma kɔ veelu nda. Ndoo yeema le sinaa te lende i yɔŋnuŋ ni. Mɛɛ nda hiŋ, mbo dimul nda vɛlɛ le ma baŋ wulaŋ. Kɛ a tosa le kanifuule ndaa nɔ tiindaŋndo o Jɛhowa niŋ. Ma mulul Nɛbukanɛɛsa aa: ‘Mɛlɛka naa naŋ cho biiloo wo nɔla mbo kiindiaa naa. Kɛlɛŋgaa mbo kiindiaa naa bɛɛ pɛŋ te, ŋ beŋ wulaŋ miŋ sooluu piɔm numndo le.’

Mɛɛ Nɛbukanɛɛsa tuei mɛɛ nda soo yɛ, mbo chɔɔlu tumbe dɔunɔŋ tau. Yiŋnde bɛŋndeŋ le wa nda ikɛi kpɛɛluŋ okoŋ mbo dimul waŋnda aa: ‘La chɔɔlu yiŋndeŋ beeŋguu bɛmbɔɔ le ŋɔmmɛu mbo hiou maa paandu!’ Okoŋ mbo dimul sowɛiyaa nduaa mayoomuaa le ma yii Sedaaki, Misiaki, a Bɛniŋgo ma wou nda o yiŋnde leŋ niŋ. Le mɛɛ yiŋndeŋ le hiou tuuloo maa paandu yɛ, mi haŋgul ndɔɔ dii laŋgbaa kuɛ a nda wa. Kɛ yɛɛnɛ ndoo yɔŋnuŋ yɛ a puaambuaa nda wou kaŋ o yiŋndeŋ leŋ niŋnda?

Mɛɛ masaa nua o yiŋndeŋ niŋ mbo cha wanaa hiɔɔlu leniŋ, mɛɛ mi sioonde bii ndu tau. Okoŋ mbo nyuna wanaa wa ndu ikɛiya aa: ‘Wanaa yaa le naŋ yii miŋ wou nda o yiŋndeŋ niŋ te?

Ma mulul ndu aa: ‘Ei, masaa.’

Mɛɛ mi masaa dimi aa: ‘Kɛ waŋnda a hiɔɔlu ya cho chɔɔ balɔɔ o yiŋndeŋ niŋ ni, nduyɛ acho a yiyaa le, nyɛ o nyɛ bɛɛ yiŋndeŋ le yɔŋ nda vɛlɛ pɛŋ te. Waŋndo opilɔɔ naŋ chaa maalikɛinɔɔ ni.’ Mi masaa chɔɔlu sɔɔŋguu ikɛi kpɛɛluŋ mbo veelu choo choo kpeleŋ aa: ‘Sedaaki! Misiaki! Bɛniŋgo! Nya buɛiyaa Mɛlɛka Bɛndoo Choo choo, la fula mila hiŋ naŋ!’

Mɛɛ nda fula, mi nda kpou cha maa yiŋndeŋ le yɔŋ nda nyɛ o nyɛ le. Okoŋ mi masaa dimi aa: ‘Saŋgalaa cho le Mɛlɛka Sedaaki, Misiaki a Bɛniŋgo wo! O yɔŋ maalikɛinɔ ndɔɔ mbo kiindiaa nda, kanifuule a beŋ wulaŋ ma sooluu mɛlɛka cheleŋ te, mɛɛ Mɛlɛka ndaa kinɛi.’

Naa bɛɛ ŋ nɔ miŋ lo o laalaŋndo choo o Jɛhowalo maa puaambuaa haa.