NGA sungamene matoko mama? Akundi a Daniele, ana batina o dia madia ke makala mambote ko vana meso mau. Esi Babele babayikilanga vo Saderake, Misake yo Abedengo. Ubatala ovava. Ekuma ke bafukamene ko e teke kiaki kiampwena nze una bevanganga akaka? Yambula twazaya ekuma.

Nga sungamene nsiku mina kasoneka Yave yandi kibeni miyikwanga vo Nkanikinu Kumi? Nsiku antete i wau: ‘Kusambila Nzambi zakaka oku ngina ko.’ O nsiku wau ubelemvokelanga o matoko mama, kana una vo ke diambu diakete ko.

Nebukandesa wa ntinu otumisi mfumu zayingi beza kunda e teke kiaki kadongeleka. Ovovese kwa nkangu wawonso vo: ‘Vava nuwa e mpungi y’etutu ye mpila zawonso za masikilu, nufukama nwakunda teke kiaki kia wolo. Konso ona olembi fukama kakunda, otubwa mun’esoka dia tiya.’

Vava Nebukandesa kazaya vo Saderake, Misake yo Abedengo ke bakundidi kio ko, ofungidi makasi. Oyikidi vo batwaswa kwa yandi. Ubavene elau diansuka. Kansi, matoko babunda Yave e vuvu. Bavovese Nebukandesa vo: ‘O Nzambi eto, ona tusadilanga, olenda kututanina, kana nkutu katutanini ko, ke tusambila teke kiaku kiawolo ko.’

Nebukandesa ofungidi makasi vava kawidi mvovo miami. Oyikidi vo, ‘bayandula esoka dia tiya, bawokesa mbangazi nkumbu nsambwadi.’ I bosi, ovovese makesa ma vu kiandi bakanga Saderake yo Mesake yo Abedengo, babatuba mun’esoka dia tiya. Wau vo esoka diasaka oyanduka, o nlaku a tiya uvondele makesa mamana. Adieyi ozevo diabwila wantu tatu ana batubwa mun’esoka?

O ntinu otadidi muna kati omwene wonga. Oyuvwidi vo: ‘Nga ke wantu tatu akangama tutubidi vana kati kwa tiya ko e?’

Ntaudi zandi bavutwidi vo “kielekà tu, e ntinu.”

O ntinu ovovele vo: ‘Mbwene wantu yá akutuluka bediatanga vana kati kwa tiya, lembi via. E mpw’a ndiona weya ina nze mwan’a nzambi.’ O ntinu ofinamene vana muelo esoka yo vova vo: ‘E Saderake yo Mesake yo Abedengo, ntaudi za Nzambi Ampungu, nuvaika.’

Vava bavaika awonso bamwene vo o tiya ke tukedi ye ngolo mu nitu zau ko. O ntinu ovovele vo: ‘Okembelw’o Nzambi a Saderake yo Mesake yo Abedengo, on’otumini mbasi andi katanina ntaudi zandi ana bambundidi e vuvu, ke basadila ngatu kunda konso nzambi ko, nanga Nzambi au kaka.’

Eyayi nga ke mbandu ambote ko ya songa kwikizi kwa Yave tufwete tanginina?