Chihande 77

Kavate Kulifukula

NAWANUKA vyavava vakweze vatatu, ngwetu? Eyo, vakivo masepa jaNdanyele vaze vakanyine kulya vyuma vyachijila kuli vakivo. Vaka-Mbavilone vavasanyikilenga ngwavo Shatalake, Meshake, naAvete-nengo. Jino achivatale. Mwomwo ika kaveshi nakulifukula kulikombelo lyalinene nge muvanakulinga vakwavo vosenako? Tuwanenu chalingishile.

Nawanuka jishimbi asonekele yavene Yehova vavulukile ngwavo Jishimbi Likumi, ngwetu? Lwakulivanga lukiko luno ngwavo: ‘Kanda mukalifukula kutulunga vekako shina yami kaha.’ Vakweze ava vanakukava lushimbi kana, numba tuhu kacheshi chachashi kulingamoko.

Mwangana waMbavilone, Nevukataneza, nasanyika vatu vavalemu kwiza nakuvumbika likombelo lize natungu. Kalinwomu nakumisa kuhanjika kuvatu ngwenyi: ‘Omu namwivwa kuvuma chajineta, tulyalya navisaji vikwavo mwatela kulimbila hamavu nakulemesa likombelo lyaulu. Wosena mwakana kulimbila hamavu nakulifukula navamumbila mulilungu lyakakahya.’

Omu Nevukataneza nevu ngwavo Shatalake, Meshake naAvete-nengo kavalimbilile hamavuko, himwatenuka. Mwavalweza vavanehe kuli ikiye. Mwavalweza veseke cheka kulifukula. Oloze vakweze vanafwelela muli Yehova. Navamulweza Nevukataneza ngwavo: ‘Kalunga ketu ou tweji kuzachilanga nahase kutuyovola. Numba tuhu nge keshi kutuyovolako, etu katweshi kulifukula kulikombelo lyove lyauluko.’

Hakwivwa ngocho, Nevukataneza hikutenuka jino chikuma. Lilungu lili mwakamwihi, jino ngwenyi: ‘Lyenyesenu lilungu kuhambakana nomu valyenyesa lyehi katanu nakavali! Mwatuma malunga vajingolo chikuma hamaswalale jenyi vakase Shatalake, Meshake naAvete-nengo nakuvambila mulilungu. Lilungu linakwate kakahya chikuma ngocho milangi yakakahya hikujiha vaze malunga vaundume. Nyi vaze vakweze vatatu vambililemo?

Mwangana hakutala mulilungu, woma unamukwate. Hikuhula ngwenyi: ‘Uno vakweze vatatu katwavakasanga nakuvambila mulilungu lyakakahyako nyi?’

Vangamba jenyi ngwavo: ‘Eyo, mutwalinganga.’

Ikiye ngwenyi: ‘Oloze ngunamono malunga vawana vali nakutambuka mukakahya. Kaveshi vakukasako, kuwema nawa chiku. Kaha wamuchiwana nafwane nge mwanatulunga.’ Mwangana mwapandama kuchikolo chalilungu nakuvilika ngwenyi: ‘Enu vaShatalake! naMeshake! naAvete-nengo! Enu vangamba jaKalunga waKulitulaho, luvokenumo!’

Omu vanalovokamo, vosena vanavamono kwijiva vape. Jino mwangana ngwenyi: ‘Vamukisule Kalunga kavaShatalake, naMeshake naAvete-nengo! Natumu kangelo kenyi nakuvayovola hakuhona kulimbila hamavu nakulemesa kalunga weka, kuvanga Kalunga kavo kaha.’

Echi hichakutalilaho chakutulweza mutwatela kushishika kuli Yehova ngwetu?

Kulovoka 20:3; Ndanyele 3:1-30.