Sturka 77

Diara Kumi Sin Yaban Baui Bangwras Kan

KUPIAM krauisa naha wahmika yuhmpa na dukyara pat aisan ba? Au, witin nani ba Danyal panika king pata wina piaia apia win nani sa. Babilun uplika nani mita witin nani ra Sadrak, Misak bara Abid–Negu maki kan. Sakuna nanara kaiki kais. Dia muni witin nani upla wala nani ba baku, lilkika tara ba mawanra baui bangwras sa ki? Kaisa kaikaia dia muni sapa.

Kupiam kraukisma Jehova ai mihta ni ulban lâka nani ba, Lâ 10 maki ba? Lâ pas ba ra naku ulban sa: ‘Gâd wala kumira sin baui mayuni bangwpara, yang ra baman.’ Baha mita wahma nani na baha lâka ba alki brih bangwisa, bankra baha daukaia ba isi apia kabia sin.

Babilun kingka Nibyukadnisar ba, upla kulkanka tara bri ailal ra paiwan, naha lilkika tara paskan ba ra baui mayunbia dukyara. Bara witin upla nani ra win: ‘Man nani syîp aringka, arp bara lawana dukya nani binka sat sat walma pyua ra, baui gul wal paskan lilkika na ra mayuni bangws. Sakuna ya baui mayunras nani ra, minitka ra pauta lakni kubuska kum ra lulkan kabia.’

Nibyukadnisar ba, Sadrak, Misak bara Abid–Negu nani ba baui mayunras sa walan taim, witin uba ai kupia sauhki, yaban witin mawanra brih wabia. Witin nani ra sans wala kum yaban baui mayunbia dukyara. Sakuna wahma nani ba Jehova ra kasak luki kan bara win: ‘Mayuni bangwisna Gâdka ba swaki ai sakaia sip sa. Witin baku daukras kabia sin, lilkika paskram ba ra baui mayuni bangwamna apia.’

Naku aisan ba wali, Nibyukadnisar kau ai kupia sauhkan. Kubus tara kum lamara kan, bara naku daukbia adarka yaban: ‘Kubuska ba kainara lapta kan ba wina aima 7 taim kau lapta dauks.’ Bara ai suldiarka tilara waitna nani kau karna kan nani ra adar yaban Sadrak, Misak bara Abid–Negu ra wilki kubus pauta laknika ra lulkbia. Kubuska ba uba lapta kan bara pauta laknika ba mita waitna karnakira nani ba ra ikan. Sakuna, wahmika yuhmpa pauta ra lulkan ba ra dia takan?

King ba kubuska bilara kaiki uba sirang iwi, bara ai albika nani ra makabi walan: ‘Yawan waitna yuhmpa ra kubus bilara wilki lulkan apia?’

Bara albika nani ba taui win: ‘Au, yawan baku daukan.’

Bara king mita win: ‘Sakuna yang waitna walhwal pauta bilara wapisa kaikisna. Witin nani amras bara wilkras sa kaikisna. Bara walhwalka ba gâd kum talya sa.’ King ba kubuska tara durka ra wih winan: ‘Sadrak! Misak! Abid–Negu! Gâd lai purara ba albika nani, bal taki bangws!’

Witin nani ba taki bangwan taim, upla sut kaikan ami bangwras kan ba. Bara king ba aisan: ‘Sadrak, Misak bara Abid–Negu Gâdka ba mayunan kabia! Witin ai insalka ra blikan, witin nani ra swaki sakaia kan witin nani ra diara kumi sin munan gâd wala nani mawanra baui mayunras kan, ban sakuna ai Gâdka ra baman.’

Jehova ra kasak luki kaia ba dukyara, naha ba yawan mapara tanka marikanka pain kum apia sa ki?

Impakan sturka 20:3; Danyal 3:1-30.