¿Á NDÁKAʼÚN xa̱ʼa u̱ni̱ saá na̱yóʼo? Na̱yóʼo kúú na̱ migo ta̱ Daniel na̱ kǒo níxiin kuxu ña̱ʼa xíxi ta̱ rey. Na̱ ñuu Babilonia chi̱núuna ki̱vi̱ na̱yóʼo Sadrac, Mesac xíʼin Abednego. Soo vitin koto nu̱ú na̱ʼná yóʼo. ¿Ndachun kǒo xíínna kuxítína nu̱ú ña̱ʼa ña̱ i̱xava̱ʼa ta̱ rey? Yóʼo sakuaʼayó ndachun kǒo níxiinna.

¿Á ndakaʼún xa̱ʼa ley ña̱ ka̱ʼyí Jehová, ña̱ naní U̱xu̱ Ley? Ña̱ ley nu̱ú káchiña: ʼIinlá yi̱ʼi̱ ndasakáʼnundó kǒo ndasakáʼnundó inka ndióxi̱ʼ. Na̱ va̱lí yóʼo xíniso̱ʼona ña̱ káʼa̱n ley, ni íxaa yo̱ʼviña xíʼinna.

Ta̱ rey Nabucodonosor ta̱ ñuu Babilonia, ku̱a̱ʼání na̱ yiví ka̱nara ña̱ ndasakáʼnuna ña̱ʼa ña̱ i̱xava̱ʼara. Ta ña̱yóʼo ni̱ka̱ʼa̱nra xíʼinna: ʼTá ná kuniso̱ʼondó tivina ndiki̱, ta sakáʼana arpa, xíʼin ndiʼika ka̱a nu̱ú távána yaa, kuxítíndó ta ndasakáʼnundó ña̱ʼa ña̱ oro ña̱ i̱xava̱ʼi̱. Ta ndóʼó na̱ kǒo xíín kuxítí, chika̱a̱na ndóʼó ini horno nu̱ú xíxi ñuʼu̱ ná kokondóʼ.

Tá na̱kunda̱a̱-ini ta̱ Nabucodonosor xa̱ʼa ta̱ Sadrac, ta̱ Mesac xíʼin ta̱ Abednego ña̱ kǒo níxiinna kuxítína nu̱ú ña̱ʼa ña̱ i̱xava̱ʼara, ni̱sa̱a̱níra. Ka̱narana ki̱xa̱a̱na nu̱úra. Ta tuku ni̱ka̱ʼa̱nra xíʼinna ná kuxítína nu̱úña. Na̱ va̱lí yóʼo kándíxavana Jehová. Ta káchina xíʼin ta̱ Nabucodonosor: ʼNdióxi̱ndi̱ ta̱ ndásakáʼnundi̱ sáka̱kuvara ndi̱ʼi̱. Soo ni ná kǒo sáka̱kura ndi̱ʼi̱ ni saáví kǒo kuxítíndi̱ nu̱ú ña̱ʼa ña̱ oro ña̱ i̱xava̱ʼúnʼ.

Tá xíniso̱ʼo ta̱ Nabucodonosor ña̱yóʼo, ni̱sa̱a̱níra. Íyo yatin iin horno ta xa̱ʼndara chiñu: ʼSasaá va̱ʼakandó horno u̱xa̱ka yichi̱ sasaándóñaʼ, káchira. Tasaá ni̱ka̱ʼa̱nra xíʼin ta̱a na̱ káchíñu nu̱úra na̱ ndakú va̱ʼaka, ná katúnna ta̱ Sadrac, ta̱ Mesac, xíʼin ta̱ Abednego ta ná chika̱a̱nana ini horno. Ña̱ horno yóʼo níʼnikavíña ta ñuʼu̱ ña̱ kée yu̱ʼu̱ña xa̱ʼníña ta̱a na̱ ndakú yóʼo. ¿Ndáaña ndo̱ʼo u̱ni̱ saá na̱ va̱lí na̱ ta̱ánna ini horno yóʼo?

Ta̱ rey xi̱tora ini horno ta ni̱yi̱ʼvíkavíra. Ta ni̱nda̱ka̱tu̱ʼunra: ʼ¿Á su̱ví u̱ni̱ kúú na̱ ka̱túnyó ta ta̱ányó ini horno yóʼo?ʼ, káchira.

ʼU̱ni̱ kúú na̱ ta̱ányóʼ, káchi na̱ káchíñu nu̱úra.

ʼSoo, yi̱ʼi̱ ku̱mí kúú na̱ xítoi̱ xíka nu̱ú ñuʼu̱. Va̱ása núʼnina ta ñuʼu̱ yóʼo ni loʼo kǒo ña̱ʼa íxaaña xíʼinna. Ta inkara tá káa ángel saá káaraʼ, káchi ta̱ rey. Ta̱ rey kuyatinra yéʼé horno ta̱ ka̱nara: ʼSadrac, Mesac, Abednego. Ndóʼó na̱ ndásakáʼnu Ndióxi̱ míí ta̱ káʼnu, keendóʼ.

Tá ke̱ena, ndiʼi na̱ yiví xi̱ni ni loʼo ña̱ʼa kǒo níndóʼona. Tasaá ni̱ka̱ʼa̱n ta̱ rey: ʼNdasakáʼnundó Ndióxi̱ ta̱ Sadrac, ta̱ Mesac xíʼin ta̱ Abednego. Saáchi chi̱ndaʼára iin ángel ki̱xi sa̱káku na̱yóʼo chi kǒo níxiinna kuxítína ña̱ ndasakáʼnuna inka ndióxi̱ʼ.

Va̱ʼaní yichi̱ nda̱koo na̱yóʼo nu̱úyó ña̱ ndinuʼu-iniyó ndasakáʼnuyó Jehová.