KASI u ci vuluka via ava vakuendze vatatu ni vati? Ava vaze va vusamba va Ndaniele va vianene ku lia vize via-ku-lia ka via puile via cili kuli vakevo. Vakua Mbambilone va va lukile nguavo Sandelake, Mesake na Avende-nengo. Aci va tale vuovuno. Vika ka va tsikamena ou kamponia, ngue mu va na lingi vantu vose vali aha? Tu ci tantekeye.

Ua vuluka aze masiko a sonekele mpundu Yehova a va luka nguavo Masiko Likumi ni? Lisiko lia katete lia handeka ngualio: ‘Kati u ka lemese vanjambi veka ku meso ange’. Ava vakuendze va u li na ku mona aha va li na ku-ononoka ku lisiko eli, vunoni kati ca casi.

Nevukaneza, muangana ua Mbambilone, na lania vantu vose va seho linga va ku lemese kamponia ua na tungu. Vuovuno na hana lisiko ku vantu vose, ngueni: ‘Nga mu kevua ku sika ca luneta, na halupa na ku sika ceka na ceka, mu na pande ku tsikama na ku lemesa ou kamponia ua olu. Uose uze a viana ku tsikama na ku lemesa, ha ntsimbu oyo vene, va ka mu mbila mu lutengo lua tuhia’.

Omo Nevukaneza ua tantekeyele ngueni Sandelake, Mesake na Avende-nengo va ileko vunoni ka va tavele ku tsikama ua nienguele cikuma. Ngeci va va tualele kuli ikeye. Kaha ua va hele naua ntsimbu imo linga va tsikame lueka. Vunoni vakuendze va tsilielele Yehova. Va kumbuluile kuli Nevukaneza nguavo: ‘Njambi yetu u tue ku lemesa a hasa ku tuovola, vunoni ambe nga Njambi yetu, ka tuovola ka tu ka tava ku tsikamena kamponia kove ua olu.’

Kaha omo Nevukaneza ua vuile ngoco, vutenu vueni vua livuezelele cikuma. Lutengo naua lua kele ha hiehi, ngeci ua tumine ngueni: ‘Suamekenu lutengo lua tuhia vintsimbu vitanu na vivali ku tuvakana muze mua laza!’ Kaha ua tuma vamala va ngolo va ku masualele veni, kaha va kutile va Sandelake, Mesake na Avende-nengo na ku va mbila mu lutengo lua tuhia. Tuhia tuaco tua eniene cikumakuma, ngeci vaze vamala va ngolo vose va tsile ku milengi. Vika co via solokelele kuli vaze vakuendze vatatu va va mbilile mu lutengo lua tuhia?

Omo muangana ua talele mu lutengo lua tuhia ua vuile vuoma vua kama. Kaha ua hulile ngueni: ‘Kati tu na kutile na ku mbila vakuendze vatatu mu lutengo lua tuhia ni?’

Vangamba veni va kumbuluile nguavo: ‘Eyo, muane.’

Kaha ua handekele ngueni: ‘Vunoni ange nji li na ku mona vakuendze vauana va li na kuendangana mu tuhia, va na zituka kaha ka vesi na ku uema. Uze ua mu ciuana a moneka ngue umo ua vanjambi’. Kaha muangana ua suena ku hiehi na Mbelo ya lutengo lua tuhia na ku tambakana ngueni: Sandalake! Mesake! Avende-nengo! Tuhukenu, enu vangamba va Njambi Mukua ku Hiana viose!’

Kaha omo va capulukilemo, muntu uose ua va talele, ua muene ngueni ka va vulumukile. Kaha muangana ua handekele ngueni: ‘Ua ku sangaziala Njambi ya Sandelake, Mesake na Avende-nengo! Na tumu kangelo keni linga a ku vovole muomu ka va tavele ku lemesa njambi ueka, vunoni Njambi yavo lika.’

Olu lua pua lungano lua cili lua ku lemesa lika Yehova lu tua pande ku kava, ni vati?