OTO dhimbulukwa mbela kutya ngoye owu uva nale kombinga yaalumentu mbano aagundjuka yatatu? Eeno, oyo ookuume kaDaniel mboka ya tindile okulya iikulya mbyoka ya li kaayi shi iiwanawa kuyo. Aababilon oye ya luku Sadrak, Meshak naAbednego. Ihe tala ngashingeyi kuyo. Omolwashike yo itayi isizimike ngaashi ayehe yalwe koshiyelekela shika oshinenenene? Natu shi tale.

Oto dhimbulukwa mbela oompango dhi ithanwa Iipango Omulongo mbyoka Jehova a nyola ye mwene? Shotango osha ti: ‘Ngoye ku na okugalikana ookalunga yalwe kakele kangame.’ Aalumentu mbano aagundjuka otaa vulika kompango ndjika, nonando kashi shi oshipu.

Nebukadnesar, omukwaniilwa gwaBabilon, okwi ithana aantu oyendji ya simana okusimaneka oshiyelekela shika ye a ningi. Ye opo a mana okulombwela aantu ayehe ta ti: ‘Uuna tamu uvu omankuma, uuharpa niihikomwa yilwe, ne omu na okwiisizimika nokugalikana oshiyelekela shika shoshingoli. Kehe ngoka iti isizimike noita galikana, ote ku umbilwa mbalambala meziko lya hanya.’

Sho Nebukadnesar ta mono kutya Sadrak, Meshak naAbednego inayi isizimika, ye ota geye noonkondo. Ye ote ya ithana. Ye ote ya pe natango okampito yi isizimike. Ihe aalumentu aagundjuka oyi inekela Jehova. ‘Kalunga ketu ngoka hatu longele, ota vulu oku tu hupitha,’ yo taa ti kuNebukadnesar. ‘Ihe nonando ona kale inee tu hupitha, tse itatu ki isizimikila oshiyelekela shoye shoshingoli.’

Sho ye te shi uvu, natango Nebukadnesar ota geye nokuli noonkondo. Mpeyaka popepi opu na eziko nota ti: ‘Hanyekeni eziko lwiikando iheyali shi vulithe shito!’ Opo nduno aalumentu aanankondonkondo yometanga lye lyaakwiita ote ya mangitha Sadrak, Meshak naAbednego notaye ya umbile meziko. Eziko epyu ngaaka kutya aalumentu aanankondo ya dhipagwe komalaka gomulilo. Ihe ongiini kombinga yaalumentu aagundjuka yatatu mboka yo yu umbile mo?

Omukwaniilwa ota tala meziko lyomulilo nota tila noonkondo. ‘Inatu manga nani aalumentu yatatu notwe ya umbile meziko lyomulilo gwa hanya?’ ye ta pula.

‘Eeno, osho twa ningi,’ aapiya ye taa yamukula.

‘Ihe ngame ondi wete mo aalumentu yane momulilo taa endagula,’ ye ta ti. ‘Yo inaa mangwa, nomulilo itagu ya fike. Nomutine ota monika a fa kalunga.’ Omukwaniilwa ota hedha popepi nomweelo gweziko lyomulilo noti igidha mo: ‘Sadrak! Meshak! Abednego! Zeni mo, one aapiya yaKalunga gwOpo-mbandambanda!’

Sho yo taa zi mo, ayehe otaa vulu okumona kutya yo inaa ningwa sha. Opo nduno omukwaniilwa ota ti: ‘Kalunga kaSadrak, Meshak naAbednego na simanekwe! Ye okwa tumu omuyengeli gwe nokwe ya hupitha molwashoka yo inaya hala yi isizimike nokugalikana kalunga kalwe kakele kakalunga kawo.’

Osho oshiholelwa oshiwanawa kutse shuudhiginini muJehova, hasho mbela?