NA O gopola o ekwa ka masogana a a mararo? Ee, ke bagwera ba Daniele bao ba ilego ba gana go ja dijo tšeo go bego go sa swanela gore ba di je. Bababilona ba be ba ba bitša Shaderaka, Meshaka le Abedinego. Eupša ba lebelele gape. Ke ka baka la’ng ba sa khunamele seswantšho se se segolo go swana le batho ba bangwe? Anke re bone.

Na o sa gopola melao yeo Jehofa a ilego a e ngwala yeo e bitšwago Melao e Lesome? Wa pele o re: ‘O se ke wa rapela medimo le ge e le efe e mengwe ka ntle le nna.’ Masogana a a latela molao wo, gaešita le ge go se bonolo go dira bjalo.

Nebukadinetsara kgoši ya Babilona o be a biditše batho ba bantši ba maemo gore ba tle ba khunamele seswantšho se seo a se hlomilego. O be a sa tšwa go botša batho ka moka gore: ‘Ge le ekwa modumo wa mapatata, diharepa le diletšo tše dingwe tša mmino, le khuname gomme le rapele seswantšho se sa gauta. Mang le mang yo a sa khunamego a se rapela, o tla lahlelwa sebešong sa mollo o fišago.’

Ge Nebukadinetsara a ekwa gore Shaderaka, Meshaka le Abedinego ga se ba se khunamela, a galefa kudu. A laela gore ba tlišwe go yena. A ba botša gore ge ba ekwa diletšo tša mmino gape ba khuname. Eupša masogana a a be a botile Jehofa. A re go Nebukadinetsara: ‘Modimo wa rena yo re mo hlankelago o tla kgona go re hlakodiša. Eupša le ge a ka se re hlakodiše, re ka se khunamele seswantšho sa gago sa gauta.’

Ge Nebukadinetsara a ekwa se, a galefa kudu le go feta. Ka ge go be go na le sebešo kgauswi le moo, o ile a laela a re: ‘Bešeletšang sebešo ka makga a šupago gore se fiše kudu go feta pele!’ Ke moka a laela banna ba bangwe ba dinatla mo go bahlabani ba gagwe gore ba tleme Shaderaka, Meshaka le Abedinego gomme ba ba lahlele sebešong sa mollo. Se be se fiša kudu moo banna bao ba ilego ba bolawa ke dikgabo tša mollo woo. Eupša go ile gwa direga’ng ka masogana a mararo ao banna bao ba a lahletšego ka sebešong?

Kgoši e ile ya lebelela ka sebešong gomme ya tšhoga kudu. Ya botšiša ya re: ‘Na ga se ra tlema banna ba bararo gomme ra ba lahlela mollong o fišago?’

Bahlanka ba yona ba re: ‘Ee, re dirile bjalo.’

Ya re go bona: ‘Eupša ke bona banna ba bane ba itshepelela ka mollong. Ga se ba tlengwa e bile mollo ga o ba fiše. Wa bone o swana le modimo.’ Kgoši ya batamela mojakong wa sebešo gomme ya goeletša ya re: ‘Shaderaka, Meshaka le Abedinego! Etšwang lena bahlanka ba Modimo Yo Godimodimo!’

Ge ba tšwile ka moo, batho bohle ba bona gore ga se ba fsa. Ke moka kgoši ya re: ‘A go retwe Modimo wa Shaderaka, Meshaka le Abedinego! O rometše morongwa wa gagwe gomme a ba hlakodiša ka gobane ga se ba khunama le go rapela modimo le ge e le ofe ka ntle le wa bona.’

Na wo ga se mohlala o mobotse wa go botegela Jehofa wo re swanetšego go o latela?

Ekisodo 20:3; Daniele 3:1-30.