BO TA kòrda ku nos a lesa di e tres hóbennan aki? Sí, nan ta e amigunan di Daniel ku a nenga di kome loke no tabata bon pa nan. E babilonionan a yama nan Sadrak, Mesak i Abed-nego. Pero mira nan awor. Pakiko nan no a bùig pa e imágen grandi meskos ku tur otro hende? Ban mira.

Bo ta kòrda e lei ku Yehova mes a skirbi yamá Dies Mandamentu? E promé mandamentu ta: ‘Bo no mag adorá ningun otro dios sino ami so.’ E tres hóbennan a obedesé e lei ei, ounke no tabata fásil.

Nabukodonosor, rei di Babilonia, a yama hopi hende importante pa nan onra e imágen ku el a traha. El a kaba di bisa tur hende: ‘Ora boso tende zonidu di kachu, harpa i otro instrumènt musikal, boso tin ku bùig i adorá e imágen di oro. Ken ku no bùig i adorá lo ser tirá den un fòrnu di kandela kayente-kayente umbes.’

Ora Nabukodonosor a tende ku Sadrak, Mesak i Abed-nego no a bùig, el a rabia mashá. El a manda pa trese nan serka dje. El a duna nan un oportunidat mas pa bùig. Pero e hóbennan a konfia den Yehova. Nan a bisa Nabukodonosor: ‘Nos Dios kende nos ta sirbi por salba nos. Pero maske e no salba nos, nos lo no bùig pa bo imágen di oro.’

Ora Nabukodonosor a tende esei, el a rabia asta mas. Tabatin un fòrnu ei serka i el a manda: ‘Keinta e fòrnu shete bes mas kayente ku promé!’ Anto el a laga e hòmbernan di mas fuerte di su ehérsito mara Sadrak, Mesak i Abed-nego i tira nan den e fòrnu. E fòrnu tabata asina kayente ku e vlamnan a mata e hòmbernan fuerte. Pero, kiko di e tres hóbennan ku nan a tira eiden?

E rei a wak den e fòrnu, i a haña masha miedu. El a puntra: ‘No ta tres hòmber nos a mara i tira den e fòrnu di kandela kayente-kayente?’

Su kriánan a kontestá: ‘Sigur ku sí.’

E di: ‘Pero mi ta mira kuater hòmber kanando rònt den e kandela, i nan no ta mará ni e kandela no ta hasi nan nada. I esun di kuater ta parse un dios.’ E rei a hala mas serka di e porta di fòrnu i a grita: ‘Sadrak! Mesak! Abed-nego! Sali pafó, sirbidónan di e Dios Haltísimo!’

Ora nan a sali, tur hende por a mira ku nan no a sufri daño. Anto e rei a bisa: ‘Alabá sea e Dios di Sadrak, Mesak i Abed-nego! El a manda su angel i a salba nan pasobra nan no kier a bùig i adorá ningun dios fuera di nan mes Dios.’

Esei no ta un bon ehèmpel di fieldat na Yehova pa nos sigui?

Eksodo 20:3; Daniel 3:1-30.