Mana imapis kʼumuykuchirqachu
77 yachachiy
Mana imapis kʼumuykuchirqachu
¿KAY kimsa waynasmanta yuyarikunkichu? Ari, Danielpa munasqa masisnin kanku. Paykuna mana allin kaq mikhunata mana mikhuyta munarqankuchu. Babiloniosqa Sadrac, Mesac, Abednego nispa suticharqanku. Kunan paykunata qhawariy, ¿imarayku mana chay lantiman kʼumuykukuchkankuchu? Chayta qhawarina.
¿Jehová 10 kamachiykunata qusqan yuyarinkichu? Ñawpa kaqqa kay: ‘Ñuqamanta, wak dioskunataqa mana yupaychanaykichu tiyan’. Kay waynasqa mana imata manchachikuspa chay kamachiyta kasukuchkanku.
Babiloniamanta rey Nabucodonosorqa tukuy runa kay lantita yupaychanankupaq sayachin. Tukuy runaman kayta nirqa: ‘Pututusta, arpasta, tukuy tocanasta uyariytawan, kay quri lantiman kʼumuykukuspa yupaychankichik. Pichus mana kʼumuykukunqachu nitaq yupaychanqachu, chay rato juk lawrachkaq hornoman wikchʼusqa kanqa’, nispa.
Nabucodonosorqa Sadrac, Mesac, Abednego ima, mana kʼumuykukusqankuta uyarispa mayta phiñakurqa, kimsantinta apachimuytawan kʼumuykukunankuta juktawan nirqa. Chaywanpis waynakunaqa Jehovapi atiykukurqanku. ‘Ñuqayku yupaychayku chay Diosniykuqa, salvayta atiwasqayku. Mana ajina kaptinpis, manapuni qurimanta ruwasqa lantitaqa yupaychasqaykuchu’, nispa kutichirqanku.
Nabucodonosor kayta uyariytawan astawan phiñakurqa. Juk horno qayllanpi karqa, paytaq kamachirqa: ‘¡Hornota qanchis kutita astawan ruphata parichiychik!’, nispa. Chaymata astawan kallpasapa soldadosninta Sadracta, Mesacta, Abednegota ima, wataykuspa hornoman wikchʼuykunankuta nirqa. Hornoqa may rupha kachkarqa, chayrayku waynasta hornoman wikchʼuqkuna ruphakuspa wañurqanku. Chaywanpis, ¿imanakurqankutaq chay kimsa waynasri?
Rey hornota qhawaytawan, mancharikuspa nirqa: ‘¿Manachu kimsa runallata wataykuspa, lawrachkaq hornoman wikchʼuykurqanchik?’, nispa.
‘Ari, jinata ruwarqanchik’, nispa kamachisnin kutichirqanku.
Reytaq nirqa: ‘Kunantaq ninapi purichkaqta tawa qharista rikuchkani. Mana watasqachu kanku, nitaq ninapis paykunata ruphachkanchu. Tawa kaqtaq juk diosman rikchʼakun’, nispa. Reyqa punkuman chimpaykuspa qhaparirqa: ‘¡Sadrac! ¡Mesac! ¡Abednego! ¡Diospa kamachisnin, lluqsimuychik!’, nispa.
Lluqsimuptinkutaq, tukuy runa mana imanakusqankuta rikurqanku. Chanta rey nirqa: ‘¡Sadracpa, Mesacpa, Abednegop, Diosninkuqa jatunchasqa kachun! Pay angelninta paykunata librananpaq kachamurqa. Mana wak dioskunata yupaychasqankurayku’, nispa.
¿Manachu kay waynas juntʼa sunqu kananchikpaq yanapawanchik?
