¿LA XESACH ta pa ajolom ri oxibʼ alabʼom? Jeʼ, e are ri täq rachiʼl ri Daniel che xkexutuj utijowik ri täq jastaq utz ta chike. Ri täq Babilonios xkebʼij Sadrac, Mesac xuqujeʼ Abednego chike. Chawilampeʼ pa ri wachbʼäl. ¿Suche tijan ta kexukiʼ, o kexekë, chuwäch wajun nimalaj tyox junam che tijan kkebʼan ri nikʼaj chik winaq? Kqil na suche xkebʼan ta wariʼ.

¿La xsach ta chawe ri täq utaqonik ri Jehová xutzʼibʼaj ojer kibʼiʼ, ri täq Lajuj Utaqonik? Ri nabʼe are: ‹Xaq maya kiqʼij nikʼaj chik täq dioses che nuwäch in›. Wa täq alabʼom tijan kkenimaj wajun taqonik riʼ, tekʼuriʼ kʼäx kkeriq che ubʼanik wariʼ.

Nabucodonosor, ri ajawinel rech Babilonia, xeʼusikʼij kʼi täq winaq nim kibʼantajik rech kkeya uqʼij wajun tyox xubʼano. Xubʼij wariʼ chike ronojel ri winaq: ‹Chiʼ kita ri uchʼabʼal ri rukʼaʼ chij, ri täq arpas xuqujeʼ nikʼaj chik kkesaj qʼojom, chixukuloq, o chixekë, xuqujeʼ chiya uqʼij wajun tyox rech qʼan pwäq. Jachin laʼ kxukeʼ täj xuqujeʼ kuya ta uqʼij wajun tyox kqaya chupam jun tuj nojinäq che qʼaqʼ›.

Chiʼ Nabucodonosor xuto che Sadrac, Mesac xuqujeʼ Abednego xkebʼan ta wariʼ, sibʼalaj xpe royowal, o riwal. Xeʼutaq ukʼamik ri oxibʼ alabʼom chuwäch. Xubʼij chi ukamul chike che kkebʼan wariʼ. Tekʼuriʼ wa täq alabʼom xkekubʼsaj kikʼuʼx che Jehová. ‹Ri qaDios che kqapatanej kojuchajej na›, xechaʼ. ‹We kojutoʼ o kojutoʼ täj, öj kojxukeʼ ta chuwäch ri atyox.›

Chiʼ xuta wariʼ, Nabucodonosor xnimar ri royowal, o riwal. Kʼo jun tuj naqaj, tekʼuriʼ xubʼij wariʼ: ‹¡Chimeqʼsaj ri tuj wuqubʼ mul chuwäch nabʼe kanoq!› Tekʼuriʼ xubʼij chike nikʼaj ajchʼoj sibʼalaj nim kichoqʼabʼ che kkexim ri Sadrac, Mesac xuqujeʼ Abednego tekʼuriʼ kkeya pa ri tuj. Ri tuj sibʼalaj miqʼin, rumal laʼ ri qʼaqʼ xeʼukamsaj wa täq achijabʼ nim kichoqʼabʼ. Tekʼuriʼ ¿su xkeriq wa oxibʼ alabʼom che xeyaʼ pa ri tuj?

Ri ajawinel xkaʼy chupam ri tuj, sibʼalaj xuxibʼij ribʼ. ‹¿La oxibʼ achijabʼ xqaximo tekʼuriʼ xqaya chupam ri tuj nojinäq che qʼaqʼ?› Xchaʼ ri ajawinel:

‹Jeʼ, are laʼ xqabʼano›, xechaʼ ri täq ajpatanel.

‹In kinwil kajibʼ achijabʼ tijan kebʼin chupam ri qʼaqʼ›, xchaʼ. ‹Kiximom ta kibʼ, xuqujeʼ kʼot kubʼan ri qʼaqʼ chike. Xuqujeʼ ri ukaj achi junam kkaʼy rukʼ jun ángel.› Ri ajawinel xbʼe che unaqaj ri uchiʼ ri tuj tekʼuriʼ xubʼij wariʼ: ‹¡Sadrac! ¡Mesac! ¡Abednego! ¡Chixel loq, ix patanel re ri nimalaj Ajawaxel!›

Chiʼ xeʼel loq, konojel ri winaq xkilo che kʼot nijun kʼäx xkeriq ri alabʼom. Rumal laʼ ri ajawinel xubʼij wariʼ: ‹¡Nim uqʼij ri kiDios ri Sadrac, Mesac xuqujeʼ ri Abednego! Xutaq lo ri uʼangel rech keʼuchajej, rumal laʼ kʼot xbʼanow chike che kexukeʼ xuqujeʼ kkeya uqʼij jun tyox, xaq xiw ri kiDios kkeya uqʼij›.

Wariʼ jun utzalaj kʼutbʼal rech kqabʼan sukʼ chuwäch ri Jehová.