¿YUYACHKANKICHU kay kimsa mozokunamanta yachasqaykita? Paykunaqa Danielpa kimsa amigonkunam, paykunamá mana munarqakuchu mikuyta mana allin kaqkunata. Babilonia nacionpi runakunaqa paykunatam suticharurqaku Sadrac, Mesac hinaspa Abed-nego nispa. Kunan ichaqa qaway. ¿Imanasqataq paykunaqa wakin runakuna hinaqa mana qonqorakunkuchu chay taytachapa ñawpaqninpiqa? Qawasunchikyá imanasqam chayna karqa.

¿Yuyachkankichu Jehová Diospa qellqasqan Chunkantin Kamachikuyninkunata? Punta kaq kamachikuymi nirqa: ‘Ñoqallam Diosqa kani, amam huk dioskunaqa kapusunkichu’ nispa. Chaymi castigachikunanku kachkaptinpas kay mozokunaqa chay kamachikuyta kasukuchkanku.

Babilonia nacionpi rey Nabucodonosormi llapallan reqsisqa runankunata qayachimurqa rurasqan taytachanta yupaychanankupaq. Llapallan runakunata nirqa: ‘Qamkunaqa trompetata, arpata hinaspa tukuy rikchaq tocana kaqkunata uyarispam qonqorakunkichik hinaspam adorankichik qorimanta sayachisqa taytachata. Pipas mana qonqorakuqqa hinaspa mana adoraqqa chaypunillam rupachkaq hornoman wischusqa kanqa’ nispa.

Sadrac, Mesac hinaspa Abed-nego mana qonqorakusqankuta Nabucodonosor yacharuspanmi sinchita piñakururqa. Hinaspa pusarachimuspa yapatawan qonqorakunankupaq nirqa. Chay mozokunam ichaqa Jehová Diospi hapipakuspa nirqaku: ‘Yupaychasqayku Diosniykum libraykuwanqaku, ichaqa manaña librawaptinkupas manam ñoqaykuqa yupaychasaqkuchu qorimanta sayarichisqayki taytachataqa’ nispa.

Chayta uyariruspanmi Nabucodonosorqa uyanpas pukayanankama llumpayta piñakururqa. Hinaspam kamachikurqa: ‘¡Kañanankumantapas qanchis kutikamaraq hornota aswanta rupachiychik!’ nispa. Hinaspam tropankunapi wakin kallpasapa soldadonkunawan Sadracta, Mesacta hinaspa Abed-negota chaqnarachispa rupachkaq hornoman wischuykachirqa. Hornoqa llumpa-llumpayllataña rupaspanmi lenguachkaq nina chay soldadokunata wañurachirqa. Ichaqa ¿imataq pasarqa hornoman wischuykusqanku kimsa mozokunataqa?

Nabucodonosorqa horno ukuta qawaykuspanmi llumpayllataña mancharikuspa tapurqa: ‘¿Manachum kimsa chaqnasqa runakunallata rupachkaq hornomanqa wischuykurqanchik?’ nispa.

Hinaptinmi serviqninkunañataq nirqaku: ‘Arí, chaynam reynillayku’ nispa.

Chaymi reyñataq nirqa: ‘Ñoqaqa qawachkani tawa runakunatam, paykunaqa rupachkaq ninapa chawpinpim mana imanarisqa purikuchkanku, paykunawan puriq huknin runaqa rikchakusqa diosmanmi’ nispa. Reyqa hornopa punkunman asuykuspam qayarqa: ‘¡Alto-altopi kaq Diospa serviqnin Sadrac, Mesac, Abed-nego, qamkunaqa hawamanyá lloqsimuychik!’ nispa.

Rupachkaq hornomanta lloqsiramuptinku, llapallan runakuna qawaykurqaku paykunata nina mana imanasqanta. Hinaptinmi reyqa nirqa: ‘Sadracpa, Mesacpa, Abed-negopa Diosninyá alabasqa kachun. Paymi angelninta kachamurqa libraykunanpaq, paykunamá Diosnillankuta adoraspankum manataq yupaycharqakuchu nitaq adorarqakuchu huk dioskunataqa’ nispa.

¿Manachu kay yachasqanchikqa Jehová Diosman hapipakunanchikpaq yanapawanchikman?