77-нҗи хекая

Олар дыза чөкмедилер

БУ ҮЧ йигит ядыңдамы? Хава, олар Даниелиң достлары. Олар патышаның сачагындан иймәнди. Бабыллылар олара Шадрак, Мешак ве Абеднего диен ады дакыпды. Инди, олара серет. Хемме адамлар улы хейкелиң өңүнде дыза чөкселер-де, олар нәме үчин дыза чөкмейәркә? Гел, билели.

Ехованың берен Он табшырыгы ядыңдамы? Биринҗи канун: «Сен менден башга хич бир таңра сежде этмели дәлсиң» диййәр. Бу кануны ерине етирмек йигитлере кын болса-да, шу вагт олар шоны берҗай эдйәрлер.

Бабыл патышасы Небукаднезар гуран хейкелине тагзым этдирмек үчин абрайлы адамлары йыгнады. Ол яңыҗа халка: «Сурнайларың, арфаларың ве башга саз гуралларың сесини эшидениңизде, дыза чөкүп, алтын хейкеле сежде эдиң. Эгер-де ким сежде этмесе, гыздырылан пеҗе окланар» дийди.

Шадрагың, Мешагың ве Абеднегоның дыза чөкмәндигини билип, Небукаднезарың гаты гахары гелди. Ол йигитлери гетирдип, ене-де дыза чөкдүрҗек боляр. Эмма йигитлер Ехова бил баглаяр. Олар Небукаднезара: «Бизиң гуллук эдйән Худайымызың халас этмәге гүйҗи етйәр. Эгер халас этмесе-де, биз сениң алтын хейкелиң өңүнде дыза чөкмерис» диййәрлер.

Муны эшидип Небукаднезар, өңкүден-де бетер гахарланды. Голайда печь янып дурды. Ол: «Пеҗи еди эссе гаты гыздырың!» дийип буюряр. Соңра гошундакы иң гүйчли адамлара Шадрагы, Мешагы ве Абеднегоны даңып, пеҗе окламагы буюряр. Печь шейле гызгынды велин, онуң гызгыны шол гүйчли адамлары өлдүрйәр. Йөне үч йигиде нәме болдука?

Патыша пеҗиң ичине середип: «Биз гызгын пеҗе үч адамы даңып окламадыкмы нәме?» дийип, горкуп сораяр.

Хызматкәрлер оңа: «Хава, үч адамы оклапдык» дийип, җогап берйәрлер.

Патыша хайран галып: «Йөне мен одуң ичинде дөрт адамы гөрйән. Олар даңылгы дәл, өзлерем янанок. Дөрдүнҗиси болса худая меңзеш» диййәр. Патыша пеҗиң агзына барып: «Гудраты гүйчли Худайың гуллукчылары Шадрак, Мешак, Абеднего, пеҗиң ичинден чыкың!» дийип гыгыряр.

Печден чыканда, хемме адамлар оларың янмандыгыны гөрйәр. Шонда патыша: «Шадрак, Мешак ве Абеднегоның Худайына шөхрат! Оларың Худайы перишдесини иберип халас этди, себәби олар өз Худайындан башга хич бир таңра сежде этмедилер» диййәр.

Биз хем олардан гөрелде алып, Худая вепалы болмалы дәлми нәме?

Чыкыш 20:3; Даниел 3:1—30.