NOIJUKA, rundi okahurraho hali abasigazi banu abasatu? Ego, nubo banywani ba Danieri abayangire kulya ebitabasemerire. Abababuroni bakabeta Saduraki, Mesaki na Abedenego. Baitu barole hati. Habwaki batarukwinamira ekisisani kinu ekikooto nk’abandi boona? Katurole.

Noijuka ebiragiro bya Yahwe ebirukwetwa Ebiragiro Ikumi ebi yayehandikiire wenka? Ekyokubanza nikyo kinu: ‘Otaliramya baruhanga abandi kwihaho nyowe.’ Abasigazi hanu bakaba niborobera ekiragiro kinu, n’obu kiraba kyabaire kitanguhire.

Nebukadeneza, omukama wa Baburoni akaba ayesere abakungu kuha ekitiinisa ekisisani kinu eki yataireho. Hati yamara kugambira abantu boona ati: ‘Obu murahurra erika erye ikondere, n’enaanga, n’ebintu byona ebigamba, mugwe hansi muramye ekisisani kinu eky’ezabbu. Omuntu weena atainame rundi ataramye, aranagwa ahonaho hagati y’ekikomi ky’omu’ro.’

Baitu, Nebukadeneza obu yahulire nti Saduraki, Mesaki na Abedenego tibainamire ekisisani, akabihirwa muno. Yaragira babalete omu maisoge. Yabaha omugisa ogundi kukinamira. Baitu abasigazi banu nibesiga Yahwe. Bakagambira Nebukadeneza bati: ‘Ruhanga waitu ou tukuramya nasobora kutujuna, baitu n’obwatatujune, titurukwija kwinamira ekisisani kyawe eky’ezabbu.’

Abu yahulire binu, Nebukadeneza akaijura ekiniga. Hakaba haroho ekikomi ky’omu’ro haihi, kandi nukwo kuragira ati: ‘Mwongere ekibabu ky’omu’ro emirundi musanju okukira okugwakaga butosa!’ Yaragira abasaija emanzi okuboha Saduraki, Mesaki, na Abedenego babanage omu mu’ro omwingi ogurukwaka. Habwomu’ro kwokya muno, ekibabu ky’omu’ro kikaita abasaija abo abahimbire Saduraki, Mesaki na Abedenego. Baitu kiki ekyahikire h’abasigazi banu basatu?

Omukama arora omu mu’ro kandi atiina muno. Akaguza: ‘Titunagire basaija basatu ababoherwe hagati y’ekikomi ky’omu’ro?’

‘Ego nukwo,’ abahereza be bagarukamu.

Agamba ati: ‘Baitu nindora abasaija bbana abalekirwe nibagendera hagati y’omu’ro kunu tibaroho kabi. Kandi owakana nasisana nk’omwana wa Ruhanga.’ Omukama airra haihi n’ekikomi ky’omu’ro, kandi ayamirra ati: ‘Saduraki, na Mesaki na Abedenego!, abairu ba Ruhanga anyakuli haiguru muno, Murugeyo!’

Obu barugiremu, buli muntu wena akarora ngu tibahikirweho kabi koona. Omukama nukwo kwongera kugamba ati: ‘Asiimwe Ruhanga wa Saduraki, Mesaki na Abedenego! Atumire maraika kandi yabajuna habwokuba tibaikirize kwinamira rundi kuramya ruhanga weena, kwihaho owabu wenka.’

Kinu tikiri ekyokurorraho eky’obwesigwa hali Yahwe eki tusemerire kuhondera?