БО үш оолду сактыр-дыр сен бе? Ийе — ол Дании́лдиң өөрлери-дир, олар боттарынга таарымча чок аъш-чемден ойталааннар. Вавило́нчулар оларны Седрах, Мисах база Авденаго деп адап каан. Ам оларже көрүп көрем. Чүге олар шупту кижилер-биле кады улуг дүрзү-хевирге сөгүрбейн турар чоор? Билип алыылам, че.

Он хоойлуну — Иегованың бодунуң бижээн хоойлуларны —сактыр-дыр сен бе? Бирги хоойлу мындыг: ‘Менден өске бурганнарга чүдүвес ужурлуг сен’. Оларга ол хоойлуну күүседири чеже-даа берге болза, ам оолдар шак ол хоойлуга чагыртып турарлар.

Вавило́ннуң хааны Навуходоно́сор хөй хүндүлүг кижилерни, ооң тудуп алган дүрзү-хевиринге сөгүрүп бараалгазын дээш, чыып алган. Ол чаа-ла чонга бодунуң чугаазын төндүрген: ‘Эдискилерниң, арфаларның база оон-даа өске хөгжүм херекселдериниң үнүн дыңнап кааш, дискек кырынга олуруп, ол алдын дүрзү-хевирни хүндүлеп көөр ужурлуг силер. Сөгүрбээн база мөгейбээн кижи ол-ла дораан изиг суугуже киир октадыптар’.

Седрах, Мисах база Авденаго сөгүрбээн деп билип кааш, Навуходоно́сор дыка килеңнээн. Оларны эккээрин ол негээн. Ынчангаш оларга база бир сөгүрүүр арга берген. Ынчалза-даа оолдар Иеговага даянганнар. ‘Бистиң бараалгап турар Бурганывыстың бисти камгалаар күжү бар,— деп, олар Навуходоно́сорга чугаалаан.— А бир эвес ол бисти камгалавайн баар-даа болза, алдын дүрзү-хевирниң мурнунга сөгүрбес бис’.

Ону дыңнааш, Навуходоно́сор оон артык килеңней берген. Ырак эвесте суугу турган, ынчангаш ол дужааган: ‘Суугуну анаазындан чеди катап күштүг кылдыр одаптыңар!’ Ооң соонда бодунуң шериинден эң-не күштүг эр улуска Седрахты, Мисахты база Авденагону хүлээш, суугуже киир октаптар кылдыр дужааган. Суугуну дыка изиг кылдыр одапкан — ооң чалбыыжы безин күштүг эр кижилерни өлүрүп каапкан. Ынчалза-даа ол үш оол-биле чүү болган?

Хаан суугуже бакылап көргеш, аажок корткан: ‘Бис үш эр кижи хүлээш, изиг суугуже киир октапкан эвес бис бе?’

— Шак-ла ындыг, хаан,— деп, чалчалары аңаа харыылаан.

— Ынчалза-даа мен көөрүмге — отта дөрт эр кижилер кылаштажып турар чүве-дир,— деп, ол элдепсинген.— Олар хүлүттүнмээн, а чалбыыш оларга дегбейн турар. А дөрт дугаары бурганга дөмей.— Хаан суугунуң аксынга келгеш, алгырган: ‘Седрах! Мисах! Авденаго! Дээди Өрүкү Бурганның кулдары, бээр үнүңер!’

Кажан олар үнүп кээрге, шупту көөрге, чалбыыш оларга көңгүс дегбээн болган. Ынчан хаан чугаалаан: ‘Седрахтың, Мисахтың база Авденагонуң Бурганынга алдар! Ол бодунуң дээрниң төлээзин чоргускаш, оларны камгалаан, чүге дизе олар бодунуң Бурганындан аңгыда өске бурганга чүү-даа дээш сөгүрер база бараан болур хөңнү чок болган’. Иеговага шынчы болур мындыг кайгамчыктыг чижекти өттүнер ужурлуг эвес-тир бис бе?