¿YABAL xjul ta awoʼtan ta swenta te oxtul keremetik ini? Jaʼik te yamigotak te Daniel te maba la skʼan sweʼik te bin ma xjuʼ ya sweʼike. Jaʼik te Sadrac, Mesac, sok te Abed-nego te jich biiltesotik yuʼun te babilonioetike. Ilawil ta ora ini, ¿bin yuʼun te maba la skejan sbaik ta stojol te mukʼul lokʼombae, jich bitʼil la spasik te yantike? Ya kiltik bael te bin yuʼun jich la spasike.

¿Yatobal xjul ta awoʼtan te leyetik te sbiilinej Lajuneb Mantaliletik te jaʼnix la stsʼibay te Jehovae? Te sbabiale jich ya yal: Mame xawichʼ ta mukʼ yantik diosetik ta jtojol. Te jchʼiel keremetik yakalik ta yichʼel ta mukʼ te mantalil ini, manchukme tulan ta pasel.

Te ajwalil Nabucodonosor yuʼun Babilonia, la yikʼtiklan tal bayal ta jtul ants winiketik te mukʼ skʼoplalik swenta yuʼun ya yichʼik ta mukʼ te lokʼomba te la yakʼ ta tejkʼanele. Jich la yalbey ta spisil te ants winiketik: Te kʼalal ya awaʼiyik te ya x-okʼesinot te xulubiletik, te arpaetik soknix te yantik aʼtejibaletik yuʼun kʼin, yame akejan abaik ta stojol sok yame awichʼik ta mukʼ te lokʼomba te pasbil ta oroe. Te machʼa maba ya skejan sba sok maba ya yichʼ ta mukʼe, yame yichʼ chʼojel ochel ta oranax ta orno yuʼun kʼajkʼ te yak ta tilele.

Te kʼalal la snaʼ stojol te Nabucodonosor te maba la skejan sbaik te Sadrac, Mesac sok te Abed-nego kʼax bayal ilin yuʼun. La skʼan te ikʼbotuk tal ta stojole. La schaʼyaltiklambey te yakuk skejan sbaik ta stojol te lokʼombae. Jaʼukmeto ay smukʼul yoʼtanik ta stojol Jehová te jchʼiel keremetik ini. Jaʼ yuʼun jich la yalbeyik te ajwalile: Te Dios kuʼunkotik te kakʼoj jbakotik ta abatinel yuʼune ya xjuʼ ya skoltayonkotik. Manchukme ma jichuk ya xkʼot ta pasel, mananix jkejan jbakotik ta stojol-a te lokʼomba awuʼun te pasbil ta oroe.

Te kʼalal jich la yaʼiy stojol te Nabucodonosor ini kʼax bayalxan ilin yuʼun. Ay nopol orno tey-a, jaʼ yuʼun jich la yal ta mantal: ¡Toybeyaikxan jukeb buelta yip te kʼajkʼ ta ornoe! Sok la yalbey te soldadoetik yuʼun te bayal yipik te akʼa schukik te Sadrac, Mesac sok te Abed-nego yuʼun ya schʼojik ochel ta orno. Kʼax kʼajkʼubenix-a te orno te jich milotik ta yat kʼajkʼ te winiketik te bayal yipike. Jaʼukmeto, ¿bin kʼot ta stojolik stukel te oxtul jchʼiel keremetik te la yichʼik chʼojel ta ornoe?

Te ajwalil la yil ochel te yutil orno, xiwnax yuʼun, sok jich la sjojkʼoy: ¿Mabal oxtuluk te keremetik te chukul la jchʼojtik ochel ta yutil orno yuʼun kʼajkʼ te yak ta tilele?

Jich, oxtulik-a, xchiik te j-abatetik yuʼune.

Jich la yal te ajwalil: Jaʼukmeto ya kil te ayix chantul te machʼatik yak ta beel ta kʼajkʼe. Maba chukulikix, sok maʼyuk bin yakalik ta pasbeyel yuʼun te kʼajkʼe. Te xchanebale jich yilel te bin utʼil snichʼan diosetik. Noptsaj bael ta stiʼil orno te ajwalil, jich la yal ta aw: ¡Sadrac! ¡Mesac! ¡Abed-nego! ¡Lokʼanik tal, j-abatetik yuʼun Dios te Toyol aye!

Te kʼalal lokʼik tale, ilotik spisil yuʼun te ants winiketik te maʼyuk bin pasbotik yuʼun te kʼajkʼe. Jaʼ yuʼun jich la yal te ajwalile: ¡Bayalme yutsil te Dios yuʼun te Sadrac, Mesac sok te Abed-nego! Te la stikun tal chʼul abat ta skoltayel te j-abatetik yuʼune, melel mananix la skejan sbaik ta yichʼel ta mukʼ yan dios te ma jaʼuk te Dios yuʼunike.

Jich bitʼil te la yakʼik ta ilel te jun yoʼtan la yakʼ sbaik ta stojol te Jehovae, ¿mabal kʼax lekuk te ya jkʼayimbeytik te stalelike?