¿MI XVUL to ta ajol ti achanojbe skʼoplal li oxvoʼ keremetik liʼe? Jaʼ, jaʼ li yamigotak Daniel ti muʼyuk la skʼan la slajesik li veʼlil ch-akʼbatik oxe. Sadrac, Mesac xchiʼuk Abed-nego akʼbat sbiik yuʼun li jbabiloniaetike. Pe kʼelavil tana un. ¿Kʼu yuʼun ti muʼyuk ta skejan sbaik ek ta stojolal li mukʼta lokʼol kʼuchaʼal ta spasik li yantik krixchanoetike? Jkʼeltikik kʼu yuʼun.

¿Mi xvul to ta ajol li mantaletik la stsʼiba stuk Jeova, ti jaʼ sbi Lajuneb Mantaletike? Li baʼyel mantale jech ta xal: Mu me xa muyubta yan diosetik, jtuk noʼox me xa muyubtaikun, xi. Li keremetik liʼe yakal ta xchʼunik li mantal liʼe, manchuk mi mu kʼunuk ta pasel.

Li Nabucodonosor, li ajvalil ta Babiloniae, la stak ta ikʼel epal krixchanoetik ti tsots yabtelik sventa chtal smuyubtaik li lokʼol la spas liʼe. Naka to xi la jyalbe skotol li krixchanoetike: Kʼalal mi la avaʼiik li okʼesetike, li arpaetike xchiʼuk skotol li jaychop sonetike kejan abaik, muyubtaik li lokʼol pasbil ta kʼanal takʼin liʼe. Li buchʼu mu skejan sba ta smuyubtaele ta anil noʼox ta xichʼ tikʼel ochel ta orno ti xleblun skʼakʼale, xi.

Kʼalaluk la jyaʼi Nabucodonosor ti muʼyuk la skejan sbaik li Sadrac, Mesac xchiʼuk li Abed-negoe, ilin ta jyalel. La jyal mantal ti akʼo yikʼik tal ta stojolale. La jyalbe ti xuʼ to akʼo skejan sbaike. Pe li oxvoʼ keremetike spatoj yoʼontonik ta stojolal Jeova. Xi la jyalike: Li jDioskutik ti chi tunkutik ta stojolale xuʼ chi skoltaunkutik. Pe mi muʼyuke, li voʼonkutike muʼyuk bu ta jkejan jbakutik ta stojolal li lokʼol apasoje, xiik.

Kʼalal la jyaʼi jech ti Nabucodonosore, mas to ilin ta jyalel. Oy te nopol orno, vaʼun xi la jyal mantale: Vukub to velta mas xa kʼixnaik li ornoe, xi. Vaʼun la jyalbe mantal sviniktak ti toj tsotsik ta yajsoltarotak ti akʼo xchukik li Sadrac, Mesac xchiʼuk Abed-nego sventa tstikʼik ochel li ta ornoe. Li ornoe solel toj echʼ xa noʼox xpulpun skʼakʼal yuʼun ta sleb noʼox la smil li tsatsal viniketike. Pe ¿kʼusi kʼot ta pasel ta stojolal li oxvoʼ keremetik ti la jyichʼik tikʼel ochele?

Li ajvalile la skʼel ochel li ta yut ornoe, ixiʼ ta jyalel. ¿Mi mu oxvoʼuk noʼox li viniketik la jchuktik ochel ta kʼokʼe chaʼa?, xi la sjakʼ.

Oxvoʼ noʼox, xi la stakʼ li yajtuneltake.

Pe voʼon chkile chanvoʼ viniketik te xvaʼetik ta yut kʼokʼ, xi li ajvalile. Muʼyuk bu chukulik xchiʼuk noxtok muʼyuk kʼusi tspasbatik yuʼun li kʼokʼe. Li xchanvoʼal vinike xkoʼolaj kʼuchaʼal jun dios. Li ajvalile nopaj batel ta stiʼ li ornoe, xi tsots avane: ¡Sadrac! ¡Mesac! ¡Abed-nego! ¡Yajtuneltak Mukʼul Dios lokʼanik tal!, xi.

Kʼalal lokʼik tale, li krixchanoetike la jyakʼik venta ti muʼyuk bu kʼakʼemike. Jech oxal xi la jyal li ajvalile: ¡Muyubtabiluk li sDios Sadrac, Mesac xchiʼuk li Abed-negoe! Yuʼun la stak tal yaj-anjel sventa tskolta li yajtuneltak ti mu jaʼuk la skejan sbaik ta smuyubtael yan diose, ti jaʼ noʼox ta smuyubtaik li sDiosike.

¿Mi mu tauk xi xchanubtasutik ti skʼan tukʼuk koʼontontik ta stojolal Jeova li oxib keremetik liʼe?