OVE hẽ ivaluka amalẽhe ava vatatu? Amalẽhe ava akamba va Daniele, vana ka va tavele oku lia komesa ya Soma Nevukandesa. Va Bavulono va va tukula hati, Sadrake, Mesake la Aved-Nego. Tala ño ndomo va kasi. Momo lie ka va tavelele oku kuama ongangu ya vakuavo yoku fendela ociñumañuma? Tu kũlĩhĩsi ulandu waco.

Ove hẽ ivaluka Ovihandeleko Ekũi via tukuiwa la Yehova? Ocihandeleko catete ca linga hati: ‘Kuka fendele olosuku viñi te ame.’ Amalẽhe ava va kasi oku pokola kocihandeleko caco, ndaño okuti oku ci linga ka ca lelukile.

Nevukandesa, Soma yoko Bavulono, wa vilikiya omanu valua va velapo oco va fendele ociñumañuma ca tungiwa laye. Eye wa popia lomanu vosi hati: ‘Eci vu yeva ocileñi cenguena lolumbeta kuenda ovisikilo viñi viñi, wili posi fendeli ociñumañuma culu. Wosi ka wila posi kuenda ka fendela, haico muẽle a imbiwa vokati kofolono.’

Eci Nevukandesa a yeva okuti Sadrake, Mesake la Aved-Nego ka va fendelele ociñumañuma, wa tema calua. Soma wa tuma oku ka vopa. Eye wa va ĩha vali epuluvi likuavo lioku fendela ociñumañuma. Pole, amalẽhe ava va kolela ku Yehova. Ovo va kumbulula hati: ‘Suku yetu una tu vumba oka tu popela.’ ‘Pole nda ka tu popelele, ci kũlĩha okuti etu ka tu fendela ociñumañuma cove culu.’

Eci a yeva olondaka evi, onyeño ya Soma Nevukandesa ya wenguka calua. Eye wa handeleka hati: ‘Tokotisi ofolono olonjanja epanduvali.’ Noke wa handeleka asualali va pama oku kuta Sadrake la Mesake la Aved-Nego loku vaimba vofolono. Ofolono ya tokotele calua okuti ulienge wondalu wa ipaya alume vaco va pama. Oco hẽ nye ca li pita lamalẽhe vatatu va imbiwamo?

Eci Soma a vanja vokati kofolono, wa saluka calua. Kuenje wa pula hati: ‘Ka tua kutile hẽ alume vatatu loku va imba vofolono ya tokota?

Akuenje vaye va kumbulula hati, ‘oco tua linga.’

Soma wa popia hati: ‘Ame ndi lete alume vakuãla va ñuala ñuala vokati kondalu. Ka va kutiwile kuenda ondalu ka yi kasi oku va timiha. Kuenda omunu wakuãla o molẽha ndomõla o suku.’ Oco Soma wamẽla ocipepi lofolono yu wa kaluka hati: ‘Ene a Sadrake! la Mesake! la Aved-Nego! Wakuenje va Suku Tõlo tundi!’

Eci ovo va tunda vofolono, omanu vosi va mola okuti ka va kakukile londalu. Kuenje Soma wa popia hati: ‘Suku ya Sadrake la Mesake la Aved-Nego a Sivayiwe! Eye wa tuma ungelo waye oku va popela momo ka va yonguile oku vumba ndaño oku fendela osuku yimue yiñi, te lika Suku yavo muẽle.’

Ovo va lekisa ongangu yiwa yoku kolela ku Yehova.

Etundilo 20:3; Daniele 3:1-30.