HISITOLIA 77
ʼE Mole Nātou Fia Tulolo
ʼE KEI koutou manatuʼi koa te ʼu tūpulaga ʼaenī e toko tolu? ʼIo, ʼe ko te ʼu kaumeʼa ʼo Taniela ʼaē neʼe fakafisi ki te meʼa kai ʼaē neʼe mole lelei kia nātou. Neʼe fakahigoaʼi nātou e te kau Papiloni ko Satalake, mo Mesake, pea mo Apeteneko. Kae koutou sio muʼa kia nātou ʼi te temi nei. He koʼe ʼe mole nātou tulolo ki te foʼi fakatātā lahi ʼaia ohage ko te hahaʼi? Tou vakaʼi pe koteā tona tupuʼaga.
ʼE kei koutou manatuʼi te ʼu lao ʼaē neʼe tohi totonu e te ʼAtua ʼaē neʼe higoa ko te ʼu Folafola e Hogofulu? Koʼeni te ʼuluaki folafola: ‘ ʼE mole tonu ke ke atolasio ki he tahi age ʼatua gata pe kia te ʼau.’ Ko te ʼu tūpulaga ʼaenī ʼe nātou fakalogo ki te lao ʼaia, tatau aipe pe neʼe mole faigafua tona fai.
Ko Nepukanesa, te hau ʼo Papiloni, neʼe ina pāuiʼi te hahaʼi maʼuhiga ke nātou ʼōmai ʼo fakaʼapaʼapa ki te fakatātā ʼaia ʼaē neʼe ina laga. Neʼe ina ʼui fēnei ki te hahaʼi fuli: ‘Ka koutou logo anai ki te ʼu fakatagi pupuhi, mo te ʼu alepa pea mo te tahi ʼu meʼa fai mahōlō, ʼe tonu anai ke koutou tulolo pea mo koutou atolasio ki te fakatātā aulo ʼaenī. Ko ʼaē ʼe mole tulolo pea mo atolasio ki te fakatātā ʼaenī ʼe lī anai ia ki he gutuʼumu kakaha.’
ʼI te ʼiloʼi e Nepukanesa neʼe mole tulolo ia Satalake, mo Mesake pea mo Apeteneko ki te fakatātā, neʼe lahi ʼaupito ai tona ʼita. Neʼe ina fekau ke ʼaumai ia nātou kia ia. Neʼe ina toe tuku age kia nātou he tahi fealagia ke nātou tulolo ai ki te fakatātā. Kae neʼe falala te ʼu tūpulaga kia Sehova. Neʼe nātou ʼui age kia Nepukanesa: ‘Ko tomatou ʼAtua ʼaē ʼe mātou tauhi ki ai ʼe feala ke ina hāofaki mātou. Kae tatau aipe peʼe mole ina hāofaki mātou, ʼe mole mātou tulolo anai ki tau fakatātā aulo.’
ʼI tana logoʼi te ʼu palalau ʼaia, neʼe toe ʼāsili ai te ʼita ʼo Nepukanesa. Neʼe ʼi ai te gutuʼumu kakaha neʼe ōvi age pea neʼe ina fakatotonu fēnei: ‘Koutou fakakakaha te gutuʼumu ke tuʼa fitu age te mālohi ʼo tona vela!’ Pea neʼe ina ʼui age ki te ʼu tagata mālolohi ʼo tana kautau ke nātou toʼo ia Satalake, mo Mesake pea mo Apeteneko, pea ke nātou lī ia nātou ki te gutuʼumu kakaha. ʼI te kakaha ʼaupito ʼo te gutuʼumu neʼe mamate ai te ʼu tagata mālolohi ʼaia ʼi te afi. Kae neʼe feafeaʼi koa te ʼu tūpulaga e toko tolu ʼaē neʼe lī ki te afi?
Neʼe sioʼi e te hau te loto gutuʼumu, pea neʼe mataku ʼaupito ai. Pea ina fehuʼi fēnei: ‘Neʼe mole tou haʼi koa la te ʼu tagata e toko tolu, pea tou lī ia nātou ki te gutuʼumu kakaha?’
Neʼe tali age e tana ʼu kaugana: ‘ Ei.’
Neʼe ina ʼui age: ‘Kae ʼe ʼau sio ki te ʼu tagata e toko fā ʼe haʼele ʼi te loto afi.’ ʼE mole haʼihaʼi ia nātou, pea ʼe mole tutu ia nātou e te afi. Pea ko te fā tagata ʼe hage ko he ʼatua.’ Neʼe fakaōvi age te hau ki te matapā ʼo te gutuʼumu pea kalaga fēnei: ‘Satalake! Mesake! Apeteneko! Koutou ʼōmai ki tuʼa, ʼu kaugana ʼo te ʼAtua Māʼoluga!’
ʼI te temi neʼe nātou ʼōmai ai ki tuʼa, neʼe sio te hahaʼi neʼe mole nātou vela. Pea neʼe ʼui fēnei e te hau: ‘Koutou fakavikiviki ki te ʼAtua ʼo Satalake, mo Mesake pea mo Apeteneko! Neʼe ina fekauʼi tana ʼaselo pea neʼe ina hāofaki ia nātou, koteʼuhi neʼe mole nātou fia tulolo pea mo atolasio ki he tahi age ʼatua gata pe ki tonatou ʼAtua.’
ʼE mole tonu koa la ke tou mulimuli ki te faʼifaʼitaki lelei ʼaia ʼo te ʼu tūpulaga ʼaē neʼe nonofo agatonu kia Sehova?