ANA akwakumbucila acacanda ŵatatuŵa? Ali acimjakwe Daniyele ŵaŵakanile kulya yakulya yaŵayiwonaga kuŵa yangaŵa yambone. Ababelo ŵakolasile jemanjaji mena gakuti Sadilaki, Mesaki ni Abedinego. Nambo sambano ŵalole. Ana ligongo cici ngakutindiŵalila mtembe wawukulungwa mpela mwakutendela ŵanewo? Kwende tulole.

Ana akukumbucila malamusi gaŵalembile Yehofa msyene gakolanjikwa Malamusi Likumi? Lilamusi lyandanda lili lyakuti: ‘Mkasimlambila milungu jine jilijose akaŵe unepe basi.’ Acacandaŵa akupikanila lilamusi lyeleli, atamose kuti yili yakusawusya.

Mwenye jwa Babelo, Nebukadinesala, aŵilasisye ŵandu ŵakusosekwa ŵajinji kuti apelece ucimbicimbi ku mtembe wawujimicewu. Agambile kumalisya kwene kwasalila ŵandu wosope kuti: ‘Naga akupikana kulila kwa mapenga, pangwe ni yindu yine yakwimbila, akusosekwa kwinama nikulambila mtembe wa golidiwu. Jwalijose jwangasatindiŵala ni kulambila cacimponya ndaŵi jijojo m’cilangali camoto wakolela mnope.’

Nebukadinesala papikene kuti Sadilaki, Mesaki ni Abedinego nganatindiŵala, jwalakwe akutumbila mnope. Akwaŵilasya acacandawo. Akwapa upile wine wakuti atindiŵale. Nambo acacandaŵa akukulupilila Yehofa. Akumsalila Nebukadinesala kuti: ‘Mlungu jwetu jwatukumtumicila ali jwakomboleka kutukulupusya. Nambo atamose ali nganatukulupusya, ngatutindiŵalila mtembe wawo wa golidiwu.’

Papikene maloŵega, Nebukadinesala akutumbila kwamnope. Ciŵandika malogo pana cilangali ca moto. M’yoyo jwalakwe akulamula kuti: ‘Akwisilile cilangalico kakwana kamsano ni kaŵili kuti muŵe moto mnope kupundana ni pandanda! Kaneko akwasalila acalume ŵakwe ŵa mu likuga lya asilikali ŵamacili mnope kuti ŵataŵe Sadilaki, Mesaki ni Abedinego nikwaponyela m’cilangalico. Cilangalico cili camoto mnope mwati acalume ŵamacili ŵala akuwa ligongo lya malamba ga moto. Nambi wuli acacanda ŵatatu ŵaŵaponyele m’cilangalico?

Mwenye akulola m’cilangalico, kaneko akutenda ndetemu mnope. Jwalakwe akuwusya kuti: ‘Ana nganitutaŵa ŵandu ŵatatu nikwaponya m’cilangali ca moto cakolela mnopeci?’

Ŵakutumicila ŵakwe akwanga kuti: ‘Elo, twatesile yeleyo.’

Mwenyejo akuŵeceta kuti: ‘Nambo ngwawona ŵandu mcece ali mkwenda m’motomo. Nganataŵigwa, soni moto ngawukwajoca. Soni mundu jwa mcecejo akuwoneka mpela mlungu.’ Mwenyejo akwawula ciŵandika mnope ni litanga lya cilangalico ni kuŵilanga kuti: ‘Sadilaki! Mesaki! Abedinego! Jemanja ŵandumetume ŵa Mlungu jwakwinani mnope, kopokani!’

Pakopwece, jwalijose akuyiwona kuti nganapya palipose. Sambano mwenyejo akuŵeceta kuti: ‘Mlungu jwa Sadilaki, Mesaki ni Abedinego apocele lumbili! Jwalakwe atumisye malayika gakwe nikwakulupusya ligongo nganatindiŵalila ni kulambila mlungu jwine jwalijose nambo jwawope basi.’

Ana celeci ngaŵa cisyasyo cambone cakulosya kukulupilila Yehofa, cakuti m’weji tucikuye?