Coc me Cing i Kor Ot
Ododo 78
Coc me Cing i Kor Ot
GIN ango ma tye ka timme kany? Dano gitye i karama madit. Kabaka me Babilon olwongo welle ma pigi tego alip acel. Gin gitye ka tic ki kikopo me jabu ki kikopo me ryal ki atabo ma kikwanyogi ki i ot pa Jehovah ma i Jerucalem. Ento, cutcut, cing laco mo onen i yamo ci ocako coc i kor ot. Dano ducu gudoko lwor.
Belcajar, lakwar Nebukadnejar, en aye dong kabaka kombeddi. En odangnge ni kikel luryekone i ot. Kabaka owaco ni: ‘Ngat mo ma twero kwano coc man ka dok tito tyen lokke bota, kibimiye mot mapol dok bidoko laloc ma pire tek me adek-ke i ker man.’ Ento pe tye laryeko mo ma twero kwano coc ma i kor ot-ti, nyo me tito tere.
Min kabaka owinyo woo ci obino i ot cam madit-ti. En owaco ki kabaka ni: ‘Tim ber pe ibed ki lworo tutwal, tye laco mo i kerri ma ngeyo lubanga maleng. I kare ma kwaru Nebukadnejar onongo tye kabaka en okete me bedo ladit ma loyo luryekone ducu. En nyinge Daniel. Lwonge, en bititti tyen lok me gin magi ducu.’
Pi meno kikelo Daniel i ot cut. I nge kwero mot mo keken ma kimiye, Daniel ocako tito pingo Jehovah yam okwanyo Nebukadnejar kwaro Belcajar woko ki i bedo kabaka. Daniel owaco ni: ‘En onongo lawaka tutwal. Ci Jehovah opwode.’
Daniel owaco ki Belcajar ni: ‘Ento in, ingeyo gin ma otimme i kome, kadi kumeno in pud lawaka calo Nebukadnejar. In ikelo kikopo kacel ki atabo ki i ot pa Jehovah ci wutiyo kwede me matte. In ipako lubanga ma kiyubo ki yat nyo got, ento in pe iworo Lacwecwa Madit. Meno aye omiyo Lubanga ocwalo cing me coyo lok magi.’
Daniel owaco ni: ‘Man aye gin ma kicoyo, ‘MENE, MENE, TEKEL ki PARCIN.’
‘MENE tere ni Lubanga okwano nino me kerri ci otyeko woko. TEKEL tere ni kipimo in ki mijan ci kinongo ni pe ipore. PARCIN tere ni kityeko miyo kerri bot Lumedia ki Lupercia.’
Ka Daniel onongo pud tye ka lok, Lumedia ki Lupercia gucako lweny i kom Babilon. Gin guturo boma ci guneko Belcajar woko. Coc me cing ma i kor ot-ti ocobbe kakare i dyewor meno kikome! Ento gin ango ma dong bitimme i kom Luicrael kombeddi? Wabingeyo lokke ma cokcokki, ento mukwongo kong wanenu gin ma otimme i kom Daniel.
