MƐNI ngɛ nɔ yae ngɛ hiɛ ɔ? Ni ɔmɛ ngɛ okplɔɔ ngmɛmi ngua ko sisi. Babilon matsɛ ɔ tsɛ nibwɔ nguanguahi akpe kɛ ba sisi. A ngɔ sika tsu kɛ sika hiɔ kplu ɔmɛ nɛ a ya muɔɔ kɛ je Yehowa sɔlemi we ɔ ngɛ Yerusalem ɔ kɛ ngɛ da nue. Se, si kake too ɔ, a na nɔmlɔ nine ngɛ kɔɔhiɔ mi nɛ e bɔni ní ngmami ngɛ gbogbo ɔ he. Nɔ tsuaa nɔ ye gbeye.

Belshazar ji nɔ nɛ ngɛ matsɛ yee ɔ nɛ. E kpa ngmlaa kɛ tsɛ kaa, a ya ngɔ e ní leli ɔmɛ kɛ ba. Nɛ e de mɛ ke: ‘Nɔ tsuaa nɔ nɛ ma nyɛ maa kane ningma nɛ ɔ nɛ e maa tsɔɔ mi sisi ɔ, ma ha lɛ nike ní fuu nɛ ma pee lɛ nɔ yelɔ nɛ ji etɛne ngɛ matsɛ yemi ɔ mi.’ Se ní leli ɔmɛ a kpɛti nɔ ko nɔ ko nyɛ we nɛ e kane ní ngmami ɔ aloo e tsɔɔ sisi.

Manyɛ ɔ nu ngmlaa a he nɛ e ba ní yemi he ɔ. E de matsɛ ɔ ke: ‘I kpa mo pɛɛ o tsui nɛ ko po. Nyumu ko ngɛ o matsɛ yemi ɔ mi nɛ mawu klɔuklɔu ɔmɛ a mumi ngɛ e mi. Nɛ benɛ Nebukadnezar ngɛ matsɛ yee ɔ, e pee nyumu nɛ ɔ e ní leli ɔmɛ tsuo a nɔkɔtɔma. A tsɛɛ lɛ Daniel. Moo tsɔ nɛ a ya tsɛ lɛ kɛ ba, nɛ e maa tsɔɔ ningma a sisi.’

Lɔɔ he ɔ, oya nɔuu nɛ a ya ngɔ Daniel kɛ ba. Daniel kua matsɛ ɔ nike ní ɔ, nɛ e de lɛ nɔ́ nɛ ha be ko ɔ, Yehowa kpa Nebukadnezar matsɛ yemi. Daniel de lɛ ke: ‘E wo e he nɔ, nɛ Yehowa gbla e tue.’

Daniel ya nɔ nɛ e de Belshazar ke: ‘Nɛ mo Belshazar o le enɛ ɔmɛ tsuo nɛ ba Nebukadnezar nɔ, se kɛ̃ ɔ, mo hu o wo o he nɔ kaa lɛ. Nɛ o ngɔ kplu ɔmɛ nɛ a kɛ je Yehowa sɔlemi we ɔ kɛ ba nu da. Nɛ o je tso kɛ tɛ mawu ɔmɛ a yi mohu pe wa Bɔlɔ Ngua a. Enɛ ɔ heje nɛ Mawu ha nɔmlɔ nine ba ngma munyu nɛ ɔmɛ ɔ nɛ.’

Daniel de ke: ‘Ní ngmami ɔ sisi ji nɛ ɔ nɛ: MENE, MENE, TEKEL kɛ PARSIN.’

‘MENE sisi ji, Mawu kane o matsɛ yemi ligbi ɔmɛ nɛ e ngɔ lɛ kɛ ba nyagbe. TEKEL sisi ji, a ngmɛ mo ngɛ sɛni nɔ nɛ a na kaa o sui. Nɛ PARSIN hu sisi ji, a ngɔ o matsɛ yemi ɔ kɛ ha Mediabi kɛ Persiabi.’

Benɛ Daniel ngɛ munyu ɔ tue nɔuu ɔ, Media kɛ Persiabi ɔmɛ ba tua Babilon. A ngɔ ma a, nɛ a gbe Belshazar. Ní ngmami ɔ ngɛ gbogbo ɔ he ɔ, ba mi jamɛ a nyɔ ɔ mi nɔuu! Se mɛni maa ba Israelbi ɔmɛ a nɔ? Wa maa na ngɛ be kpiti mi, se kekle ɔ, ha nɛ waa hyɛ nɔ́ nɛ pee Daniel.