?NGUE sa yɛle nga? Sran’m be su di cɛn dan kpa! Babilɔni famiɛn’n yiali sran dandan ko ju akpi kɛ be wa di cɛn. Zerizalɛmu lɔ Zoova i sua nun sika ɔkwlɛ nin jɛtɛ ufue klowa nga be ko fali’n, i nun yɛ be nɔn ɔn. Sanngɛ, bé nían ɔn, sran sa yɛ ɔ su klɛ talɛ’n wun yɛ. Srɛ kunnin be dan kpa, yɛ be kwlaa be wla boli be wun.

I blɛ sɔ nun’n, nn Nɛbikadnɛzali i anunman Bɛlsazali yɛ ɔ ti famiɛn’n niɔn. Ɔ kpannin kekle kpa kɛ be yia i sa sifuɛ’m be kwlaa. Ɔ seli be kɛ: ‘sran kwlaa nga ɔ kanngan ndɛ nga be klɛli’n naan ɔ tu i bo’n, bé mɛ́n i like kpanngban kpa, yɛ be nga be mantan min’n ɔ́ wá yó be nsan su, min famiɛn diwlɛ nun.’ Sa sifuɛ’m be bali, sanngɛ be nun wie fi sa w’a kwlá kannganman fluwa’n nun, naan se kɛ i bo yɛ ɔ́ tú ɔ.

Famiɛn’n i nin’n tili be nganniɛn’n naan w’a wlu aliɛ diwlɛ’n nun lɔ. Ɔ seli famiɛn’n kɛ: ‘Nán maan ɔ angunndan’n sanngan kun. Mɛn nga a sie i yɛ’n i nun wa’n, sran kun o lɛ mɔ Ɲanmiɛn i wawɛ’n o i nun. Ɔ nannan Nɛbikadnɛzali famiɛn dilɛ blɛ su’n, ɔ fɛ i sieli i ngwlɛlɛfuɛ fanunfanun’m be su kpɛn. Sran sɔ’n be flɛ i Daniɛli. Maan be ko flɛ Daniɛli sɔ’n be bla. Ɔ́ wá tútú fluwa nga be klɛli’n i bo mán wɔ.’

Yɛ ndɛndɛ kpa, be ko flɛli Daniɛli yɛ ɔ bali ɔ. Kɛ ɔ bali’n, ninnge kwlaa nga be waan bé fá cɛ́ i’n, w’a sɔman nun. I sin’n, sa nga ti yɛ Zoova deli famiɛn dilɛ’n Bɛlsazali i nannan Nɛbikadnɛzali sa nun’n, yɛ ɔ fa fitili i ndɛ’n su ɔ. Daniɛli seli kɛ: ‘Ɔ wa tuli i wun, yɛ Ɲanmiɛn tuli i famiɛn bia’n su ɔ.’

Daniɛli kan guali su kɛ: ‘Yɛ wɔ Bɛlsazali mɔ a ti i anunman’n, a si i kwlaa sɔ’n kpan, sanngɛ a kanman ɔ wun ase mlɔnmlɔn. Wɔ maan be ko fali Zoova i sua dan nun lɔ klowa mun blɛli wɔ, yɛ a nɔnnin be nun ɔn. Kpɛkun a manmannin amuɛn nga be fali waka nin yɛbuɛ yɛ be fa yoli be’n. Yɛ w’a buman angunndan kɛ á mánmán i mɔ wɔ nguan ɲanman’n wo i sa nun’n. I sɔ ti yɛ Ɲanmiɛn maan sran sa’n wa klɛli fluwa nga ɔ.’

Daniɛli waan: ‘Like nga be klɛli’n yɛ: MENE, MENE, TEKEL, yɛ PARSIN.’

‘MENE i bo’n yɛle like kalɛ, yɛle kɛ Ɲanmiɛn w’a ka ɔ sielɛ’n i blɛ’n yɛ w’a sie i nuan. TEKEL i bo’n yɛle like sunnzunlɛ, yɛle kɛ be sunnzunnin wɔ toe su, be wunnin kɛ a ti fokofoko. PARSIN i bo’n yɛle like nun bubulɛ yɛle kɛ be bubuli ɔ famiɛn diwlɛ’n nun be mannin Medifuɛ mun nin Pɛrsifuɛ mun.’

Daniɛli i nuan’n w’a tɔman yɛ Medifuɛ nin Pɛrsifuɛ’m be wa utuli Babilɔni klɔ’n niɔn. Kɔnguɛ kunngba nun’n, be fali Babilɔni klɔ’n yɛ be kunnin Bɛlsazali. Ɔ maan ndɛ nga sran sa’n klɛli i talɛ wun’n, ɔ kpɛnnin su kɔnguɛ sɔ nun. ?Sanngɛ, ngue yɛ ɔ́ wá jú Izraɛlifuɛ’m be su ɔ? É wá wún i e ɲrun lɔ. Sanngɛ maan e dun mmua e wun sa nga ɔ́ wá jú Daniɛli su’n ka..