Maana 78nan

Bolo bɛ sɛbɛnni kɛ kogo la

MUN bɛ ka kɛ yan yɔrɔ la? Babilonɛ masakɛ ye mɔgɔ ba kelen wele ka na dumuniba la. O mɔgɔw bɛɛ tun ye faamaw ye. U bɛ ka minni kɛ ni jifilen sanulama ni jifilen warijɛlama ye minnu tara Jehova batoso kɔnɔ Jerusalɛm. Nka, yɔrɔnin kelen dɔrɔn, hadamaden tɛgɛ dɔ balala ka bɔ ten, ka sɛbɛnni daminɛ kogo la. Mɔgɔw bɛɛ ja tigɛra.

Belsazar de ye masakɛ ye sisan. Ale ye Nebukadnezar mɔden de ye. O ko kɛlen, Belsazar pɛrɛnna k’a fɔ ko a ka mɔgɔ hakilitigiw bɛɛ ka wele ka na. Masakɛ ko: ‘Ni mɔgɔ o mɔgɔ sera ka nin sɛbɛnni kalan, ka o kɔrɔ fɔ ne ye, ne bɛna fɛn caman di o tigi ma. Ne bɛna o tigi kɛ kuntigiba sabanan ye ne ka jamana kɔnɔ.’ Nka Belsazar ka mɔgɔ hakilitigi si ma se ka sɛbɛnni kalan kogo la. U ma se fana ka a kɔrɔ fɔ.

 Masakɛ woloba ye mankan mɛn minkɛ, a sinna ka na dumunikɛyɔrɔ la, walisa ka kuma masakɛ fɛ. A ko: ‘I kana siran nin cogo la! Cɛ dɔ bɛ i ka masaya kɔnɔ min bɛ Ala senumaw dɔn. I mɔkɛ Nebukadnezar tun y’a kɛ a ka hakilitigiw ka kuntigi ye. A tɔgɔ ye ko Daniɛl. A wele ka na. A bɛna nin fɛn bɛɛ kɔrɔ fɔ i ye.’

U ye Daniɛl lana o yɔrɔnin bɛɛ la. Daniɛl ma sɔn nilifɛn si la. Daniɛl fɔlɔla k’a fɔ Belsazar ye, kun min na Jehova ye a mɔkɛ Nebukadnezar bɔ masaya la. A ko: ‘A kuncɛ tun ka bon kojugu. O de y’a to Jehova y’a ɲangi.’

Daniɛl taara kuma fɛ ko: ‘Nka, e Belsazar, fɛn o fɛn ye a sɔrɔ, i bɔra o bɛɛ kala ma. O bɛɛ n’a ta, e fana kɛra kuncɛba ye i ko Nebukadnezar. Jifilen minnu tun bɛ Jehova batoso kɔnɔ, i ye olu lana, ka minni kɛ u kɔnɔ. Boli minnu dilanna ni jiri ni kabakurun ye, i ye olu tanu, nka an Dabagaba, i ma o bonya. O de kosɔn Ala ye nin tɛgɛ ci walisa ka nin kumaw sɛbɛn kogo la.’

Daniɛl ko: ‘Min sɛbɛnna, o filɛ: ‘MENE, MENE, TEKƐL ani UFARSIN.’

‘MENE kɔrɔ ye ko: Ala ye i ka masaya donw jate, a ye dan bila o la. TEKƐL kɔrɔ ye ko: I pesera balansi la, nafa ma sɔrɔ i la. UFARSIN: I ka masaya dira Medikaw ni Persekaw ma.’

Daniɛl tun bɛ ka o kumaw fɔ tuma min na, Medikaw ni Persekaw tun ye Babilonɛ kɛlɛli daminɛ kaban. Persekaw ye dugu minɛ, ka Belsazar faga. Bololasɛbɛnni min kɛra kogo la, o kuma kɛra tiɲɛ ye o su yɛrɛ la. Nka, Israɛlka minnu tun bɛ Babilonɛ, olu tun bɛn’a kɛ cogo di sisan? An bɛna o ye kɔfɛ. Nka, an ka fɔlɔ k’a lajɛ fɛn min ye Daniɛl sɔrɔ.

Daniɛl 5:​1-31.