INISENIAI dahaka ia vara noho? Inai taudia be aria badana ta idia karaia noho. Babulonia ena king ese lohia taudia 1,000 ia boiria. Idia be Ierusalema dekenai Iehova ena dubu amo idia abia golo bona siliva kapusi bona disi idia gaukaralaia noho. To karaharaga, tau ta ena ima kwakikwakina idia hedinarai bona haba dekenai ia toretore matamaia. Taunimanima ibounai idia gari.

Hari Nebukanesa ena tubuna, Belesasa, be king. Iena aonega taudia ia boiridia. King ia gwau: ‘Inai toretore ia duahia bona ena anina ia gwauraia diba tauna dekenai harihari gaudia momo herea do lau henia bona inai basileia ena lohia dagina ihatoina do ia abia.’ To aonega tauna ta be haba dekenai ia noho toretorena ia duahia bona ena anina ia gwauraia diba lasi.

King ena sinana ese regerege ia kamonai bona aniani daiutu badana lalonai ia vareai. King ia hamaoroa: ‘Mani oi gari lasi. Emu basileia lalonai tau ta be dirava helagadia ia diba. Emu tubuna Nebukanesa ia king neganai, ia ese unai tau be aonega taudia ibounai edia biaguna ai ia halaoa. Iena ladana be Daniela. Ia oi boiria, bona inai toretore ena anina do ia gwauraia.’

Unai dainai maoromaoro Daniela idia hakaua vareai. Harihari gaudia ia dadaraia murinai, Daniela be Iehova ese Belesasa ena tubuna, Nebukanesa be ena king dagina amo ia kokia ena badina ia gwauraia. Daniela ia gwau: ‘Ia hekokoroku bada dainai Iehova ese ia panisia.’

Daniela ese Belesasa ia hamaoroa: ‘Ia dekenai idia vara gaudia ibounai oi diba, to oi hekokoroku noho Nebukanesa bamona. Iehova ena dubu ena kapusi bona disi oi abia mai bona idia amo oi inuinu. Nadi bona au amo idia karaia diravadia oi hanamoa, to iseda Havaraia Tauna Badana oi hanamoa lasi. Unai dainai Dirava ese inai imana ia siaia inai hereva ia torea totona.’

Daniela ia gwau: ‘Ia torea herevadia be inai: ‘MENE, MENE, TEKELE bona PARASINI.’

‘MENE anina be oiemu basileia ena nega be Dirava ese ia duahia vadaeni, bona ia hadokoa gwauraia. TEKELE anina be sikele dekenai oi ia tohoa vadaeni, bona ia itaia oi be hegeregere lasi. PARASINI anina be oiemu basileia be Mede bona Parasa taudia dekenai ia henia vadaeni.’

Daniela be ia do hereva noho lalonai, Mede bona Parasa taudia ese Babulonia idia tuari henia. Hanua idia abia bona Belesasa idia hamasea. Unai hanuaboi ai haba dekenai ia hedinarai toretorena ia vara momokani! To Israela taudia dekenai dahaka do ia vara? Gabeai unai do ita dibaia, to hari Daniela dekenai ia vara gauna do ita itaia.