ANIAT’ mapaspasamak ditoy? Ti ari ti Babilonia ti nangawis ti sangaribo nga importante a tattao iti dakkel a padaya. Us-usarenda ti kopa a balitok ken kopa a pirak ken dagiti malukong a naggapu iti templo ni Jehova idiay Jerusalem. Ngem apaman latta, ta nagparang ti ramramay ti ima ti maysa a tao ket mangrugin nga agsurat iti pader. Napabutngan ti tunggal maysa.

Ni Belsasar, ti apoko ni Nabucodonosor, ti ari itattan. Kunana nga ikkanna ti adu a sagsagut dagiti tattaona a mamasirib no maibagada ti kaipapanan dagiti sursurat. Ngem, awan kadagiti mamasirib ti makabasa ti surat wenno makaibaga ti kaipapananna.

Ti ina ti ari nangngegna ti ungor ket immay idiay dakkel a panganan. ‘Saanka nga agbuteng,’ kunana iti ari. ‘Adda tao iti pagariam a pinagbalin ni Nabucodonosor a pangulo amin dagiti mamasiribna. Daniel ti naganna. Ibagana kenka ti kaipapanan amin daytoy.’

Dagdagus, inyegda ni Daniel. Saanna a kayat ti umawat ti aniaman a sagut. Imbagana no kasano a ni Jehova inikkatna a naminsanen ni Nabucodonosor kas ari gaput’ kinatangsitna.

‘Ngem sika,’ kuna ni Daniel ken Belsasar, ‘ammom aminen a napasamak kenkuana, ket kaskasdi a natangsitka pay kas kenkuana. Imminumka kadagiti kopa ken malukong manipud templo ni Jehova. Indaydayawmo dagiti ulbod a didios imbes a ni Jehova. Isut’ gapuna nga imbaon ti Dios ti ima a mangisurat kadagitoy a sasao.’

‘Daytoy ti naisurat,’ kuna ni Daniel: ‘MENE, MENE, TEKEL ken PARSIN.’

‘MENE kayatna a sawen a binilang ti Dios ti al-aldaw ti pagariam ket pagpatinggaenna dayta. TEKEL kayatna a sawen a nakatikan iti timbengan ket nasarakanka a nagkurang. PARSIN kayatna a sawen a ti pagariam maibingbingay kadagiti Medos ken Persas.’

Iti dayta a rabii dagiti Medos ken Persas rinautda ti Babilonia. Innalada ti siudad ket pinatayda ni Belsasar. Ania ngay itan ti mapasamak kadagiti Israelitas? Maammuantayto iti mabiit. Ngem umuna kitaentayo no aniat’ napasamak ken Daniel.