YINKE yina kuhoroka apa? Vantu kuna kara nosipito sosinene. Hompa gwaBabironi kwa zigidire vagenda womulyo eyovi limwe. Awo kuna kuruganesa nonkinda dongorodo nedi dosisiliveli ntani noyipako eyi va ka gusire montembeli zaJehova moJerusarema. Nye haruka ko tupu, nonyara dokuwoko komuntu tadi moneka meguru nokutameka kutjanga pekuma. Navenye tava tukuka.

Belisasara, mutekurwaNebukadenesara, yige nye ngesi hompa. Ta zigire va rete vanandunge vendi. Hompa ta tanta asi: ‘Nkenye ogu na vhura kuresa etjango eli, a tantere nge eyi lina kutanta, tava mu pe mauhwi gomanzi ntani nga kara gwautatu mokupangera sirongo.’ Nye kwato gumwe govanandunge ogu ana kuvhura kuresa etjango lyepekuma, ndi a tante eyi lina kutanta.

Zinyahompa ta zuvhu nzogera makura ta wiza monzugo zonene zokulira. Ta tantere hompa asi: ‘Wa ha tukuka. Mosirongo soge mweli mugara gumwe ga diva vakarunga wokupongoka. Apa ga kere nyokokuru Nebukadenesara age hompa kwa mu tulire mukurona govanandunge vendi. Edina lyendi Ndaniyera. Mu tumina, makura age na ya ku tantera asi yinke yina kutanta nayinye eyi.’

Poopo makura Ndaniyera tava mu reta. Konyima zokunyoka kugusa mauhwi, Ndaniyera makura ta tameke kusanseka asi morwasinke Jehova sikando simwe ga gusilire ozinakuru vaBelisasara Nebukadenesara mouhompa. Ndaniyera ta tanta asi: ‘Age kwa linenepekere unene. Ano Jehova yiyo nye ga mu tengekere.’

Ndaniyera ta tantere Belisasara asi: ‘Nye ove wa diva nayinye eyi ya mu horokerere, nye simpe wa linenepeka ngwendi moomu ga kere Nebukadenesara. Ove kuna reta nonkinda noyipako yomontembeli zaJehova makura yiyo ono nwine mo. Ove kuna tanga vakarunga ava va ruganesa koyitji nomamanya, ano kapi ono fumadeke Musiti gwetu Gomunene. Yiyo nye ana tumine Karunga kuwoko ku ya tjange nonkango edi.’

Ndaniyera ta tanta asi: ‘Eyi vana tjanga po yeyi: MENE, MENE, TEKEL naUFARSIN.’

‘MENE kutanta asi Karunga ana vara mazuva gouhompa woge, yiyo ana u hagesa po. TEKEL kutanta asi ove kuna ku heteke posiviha, nye kuna ku mono asi o mureru. UFARSIN kutanta asi sirongo soge tava si gaununa va si gave koVamede noVaperesiya.’

Nampili posiruwo esi ana kuuyunga Ndaniyera, Vamede noVaperesiya awo vana tameke kuhomona Babironi. Awo tava kwata sitata nokudipaga Belisasara. Etjango lyepekuma tali siki mo masiku googo! Nye yinke nye nayi horokera Vaisraeli ngesi? Ntaantani tupu tu ka yi mone, nye pomuhowo tu tareni asi yinke yina kuhorokera Ndaniyera.

Ndaniyera 5:1-31, hetakanesa noNW.