Icisimicisyo 78: Ica Kulemba pa Cibumba
CINDO cilukucitika pano? Abantu bali ne kusefya ukukulu. Imfumu ya ku Babiloni yaita isausande lya bensu abacindeme. Balukupyungisye’nkomeki sye golide, ne sye silifa ne mbale ifyapintilwe ukufuma mwi tempuli lya baYehoba ku Jelusalemi. Pano, koti nififi lukoso, iminwe ya kuboko kwa mwalalume yaboneka pa mwela kabili yatatika ukulemba pa cibumba. Bonse lukoso batiina.
Belisyasa, umwinsikulu wakwe Nebukadinesa, euli imfumu pano. Abilikisya ati abalalume bakwe abamano babalete mukati. Imfumu yalabila ati: ‘Umuntu onse uwakupende’lembo ili ne kumbwenesya ukubulisisya kwaliko, akapelwa ifya mpese ifingi kabili ne kuba uwa kwikalika mu bufumu uwa bubatatu.’ Pano tapalipo neli umo pa balalume bamano uwapende’lembo pa cibumba, neli ukubulisisya kwaliko.
Banyina ba mfumu baumfwe’congo kabili baisa ku cipinda icikulu ica kulilamo. Babule’mfumu ati: ‘Ndukumukombeteleni ati mwitiina yo. Emwali umwalalume mu bufumu bwenu uwisi balesa abaswetelele. Ili bambuya wenu ba Nebukadinesa baali imfumu baalimwikalikile ati mukulu wa bamano. Isina lyakwe ni Danyeli. Lomba ngaetwe, ye akumubwenesyeni ukubulisisya.’
Popele apo balimwingisye Danyeli mukati. Panuma ya kukana ukupinta impese isili syonse, Danyeli atatika ukulabila icalengele baYehoba bafumyepo bambuya wakwe Belisyasa ba Nebukadinesa pa bufumu. Danyeli alabila ati: ‘Nipakuti balukulitota ukwakuti. Kabili baYehoba baalibapanikile.’
Danyeli aeba Belisyasa ati: ‘Pano mwebo mulisi fyonse ifyacitikile kuli bo, kabili namwe mulalitota koti nififilya ba Nebukadinesa baali. Mwalete’nkomeki ne mbale sya mwi tempuli lya baYehoba ne kunwinamo muli fyo. Mulukutota tulesa utupangilwe ne fiti ne mabwe, kabili tamulemesyepo Abalengesi Abakulu. Emulandu baLesa batumina ukuboko ku kulemba aya masiwi.
‘Ifi e filembelwe,’ Danyeli alabila ati: ‘MENE, MENE, TEKEL, UPHARSIN.’
‘MENE cilukwalula ati baLesa bapenda ubufumu bwenu ne kubusilisya. TEKEL cilukwalula ati mwapimwa pa masikelo kabili mwasangwa ati tamupo ubune muli mwebo. UPHARSIN cilukwalula ati ubufumu bwenu bwaabanisiwa ne kupelwa ku baMadai ne baPasai.’
Ili Danyeli acili alukulabila, abaMadai ne baPasai batatikako ukubasansa abaBabiloni. Bawingililo’musi ne kwipaya Belisyasa. Ica kulemba pa cibumba caba bucine bwenka bulya busiku! Pano cindo cikacitika ku baIsilaeli? Twakwisiba bukumo, pano ngatubone icilukucitika kuli Danyeli.
Danyeli 5:1-31.
Ifyakwipusya
- Cindo cacitika ili imfumu ya Babiloni ili pa mutebeto uukulu kabili ilukunwina mu nkomeci ne kulila mu mbale isyapintilwe mwi tempuli lya baYehoba ku Jelusalemi?
- Cindo Belisyasa alabila ku balalume bakwe abamano, pano bafilwa ukucite’ndo?
- Mba cindo banyina ba mfumu baibula ukucita?
- Koti fintu Danyeli abula imfumu, mba nindo baLesa batumina ukuboko ukulemba pa cibumba?
- Mba Danyeli abulisisya ati amasiwi pa cibumba alukwalule’ndo?
- Cindo cacitika ili Danyeli acilabila?
Ifyakwipusya na fimbi
- Pendeni Danyeli 5:1-31.
Pusanyeni ifi ukutina baLesa kupililbula eli ne kutina kwali pali Belisyasa ili abwene ica kulemba pa cibumba. (Dan. 5:6, 7; Amasa. 19:9; Loma. 8:35-39)
Danyeli alilangile syani ukusipa ili alukulabila na Belisyasa ne bakulu ba mu bufumu? (Dan. 5:17, 18, 22, 26-28; Cit. 4:29)
Nimuli isa’nsila Danyeli icapitala 5 cilangila ubukulu ne makosa abaYehoba? (Dan. 4:17, 25; 5:21)
