Kusoneka haMbango
Chihande 78
Kusoneka haMbango
CHUMA chika chinakusoloka hano? Vatu vali nachiwanyino chachinene. Mwangana waMbavilone nasanyika vilolo makombakaji. Vanakuzachisa jipasa jaulu najapalata namalonga amutembele yaYehova yamuYelusalema. Jino, kukasumuka, kunalovoka minwe yalivoko lyamutu mupeho nakuputuka kusoneka hambango. Vatu vosena woma unavakwate.
Muzukulu lyaNevukataneza, Mbeleshaza, ikiye mwangana. Hikusanyika jino vatu jenyi vaka-mangana. Mwangana ngwenyi: ‘Weshowo mwatanga kusonekechi nakungulweza muchinalumbunukila, navamuhana mawana amavulu kaha mwapwa muka-kuyula wamuchitatu muwangana wami.’ Oloze vaka-mangana vosena vanahono kutanga numba kulumbununa vasona vali hambango.
Naye yamwangana hakwivwa vyema himwengila muzuvo yayinene yakulila. Mwalweza mwangana ngwenyi: ‘Kanda mulizuzukila nawomako. Kuwangana wove kuli mutu ejiva tulunga vakujila. Omu kaka yove, Nevukataneza, apwile mwangana amulingishile kupwa mwata wavaka-mangana vosena. Ikiye Ndanyele. Musanyike, mwakulweza muchinalumbunukila.’
Nakulangisa chiku hikumuneha Ndanyele. Hakukana kutambula wana, Ndanyele naputuka kwambulula ovyo Yehova afumishile kaka yaMbeleshaza, Nevukataneza, hawangana. Ndanyele ngwenyi: ‘Alipambwile chikuma. Kaha Yehova amuzangamishile.’
Ndanyele mwalweza Mbeleshaza ngwenyi: ‘Kahove, vyosena vyasolokele unavitachikiza, oloze unalipambula chiwenya Nevukataneza. Unambate jipasa namalonga mutembele yaYehova nakunwinamo. Unalisa tulunga vamitondo navamalolwa, kaha Samatanga Wamunene kawamutohweseleko. Shikaho Kalunga natumu livoko lisoneke mazu ano.’
Ndanyele ngwenyi: ‘Chechi vene kusoneka vasonekanga ngwavo, MENE, MENE, TEKELE, UFWALASHINE.’
‘MENE, nge ngwavo Kalunga nalave lyehi makumbi awangana wove nakuukumisa. TEKELE, nge ngwavo vanakupezalisa lyehi kuchipezaliso kaha vanakuwane ngwavo kawatelemoko. UFWALASHINE, nge ngwavo wangana wove vanauhane kuli vaMete navaka-Peleja.’
Shimbu anakuhanjika Ndanyele, vaMete navaka-Peleja vanaputuka kulukuka Mbavilone. Kwiza nganda tambule kaha mwangana Mbeleshaza nawa jiheyo. Ufuku wauze vene vyuma vasonekanga hambango vinatesamo! Jino vika navisoloka kuli vaIsalele? Kalinwomu twijive, oloze chakulivanga tuchitalenu navisoloka kuli Ndanyele.