HETAH hian enge lo awm? Mipui hian ruai ropui tak an theh a. Babulon lalber chuan mikhual pawimawh sang khat a sawm a. Jerusalem-a Jehova biak in atanga lak rangkachak leh tangkaraw no leh thleng kumte an hmang a. Mahse, thawk leh khatah, boruakah mipa kutzungtangte a lo lang a, bangah chuan a ziak a. Mi tinin an hlau va.

Tunah Belshazara, Nebukadnezzara tupa chu lalber a ni a. A mi fingte rawn hruai turin a au va. ‘Tupawh he ziak hi chhiar a, a awmzia mi hrilh apiang thilpek tam tak pek leh he rama roreltu pawimawh ber pathumnaa siam a ni ang,’ lalber chuan a ti a. Mahse mi fiang pakhat mahin banga ziak chu an chhiarin a awmzia an sawi thei lo va.

Lalber nu chuan ri chu a hria a, chaw eina pindan zau puiah chuan a lo lut a. ‘Khawngaih takin chuti em chuan hlau suh u. I ramah hian pathian thianghlimte hretu mi pakhat a awm a. I pu Nebukadnezzara lalber a nih lai chuan a mi fingte zawng zawng chunga hotuah a siam a. A hming chu Daniela a ni. Amah chu kohtir la, heng zawng zawng awmzia hi a hrilh ang che,’ a ti a.

Tin Daniela chu an rawn hruai nghal a. Thilpek engmah a lak duh loh hnuah, Daniela chuan Belshazzara pu Nebukadnezzara chu lalber nihna atanga Jehovan vawi khata a hnawlna chhan a hrilh ta a. ‘A chapo em em a. Tin Jehovan amah a hrem ta a ni,’ Danielan a ti a.

Mahse nangin a chunga thil thleng chanchin i hre vek a, tin Nebukadnezzara ang chiahin i la chapo va. Jehova biak in atangin note leh thlengkumte i la a, zu in nan i hmang a. Thing leh lunga siam pathiante i fak a, min Siamtu Ropui i chawimawi lo va. Chuvang chuan heng thute hi ziak turin Pathianin kut chu a tir a ni,’ tiin Danielan Belshazzara a hrilh a.

Danielan: ‘Ziak chu hei hi a ni: MENE, MENE, TEKEL leh PARSIN.’

‘MENE awmzia chu i ram nite chu Pathianin a chhiar tawh a, a titawp tawh. TEKEL chu buknaa buk i ni tawh a, tha lova hmuh i ni tawh tihna. PARSIN chu i ram chu Media leh Persia-mite hnena pek a ni tawh tihna a ni,’ a ti a.

Danielan a sawi lai mek chuan, Media leh Persia-mite chuan Babulon an bei tan tawh a. Khawpui chu an man a, Belshazzara an tihlum a. Chumi zan ngei chuan banga kutziak chu a thleng dik ta a! Mahse tunah Israel-mite chungah enge thleng ang? Kan hmu chhuakthuai ang a, mahse Daniela chungah enge thleng i en hmasa ang u.