GES-⁠Y-​YÃ! Bõe la nebã sẽn maand foto wã zugã? Yaa kibs kãseng tɩ nebã rɩtẽ la b yũuda. Babilon rĩmã boola tẽngã nin-​bɛdã bãmb tusr tɩ b wa kibsã. B rɩka sãnem ne wanzuri laas nins b sẽn da wʋk Zerizalɛm, a Zeova roogã pʋgẽ wã n wa tɩ nebã tar n yũud rãam. La nug n wa n puk n gʋlsd lalgã zugu, tɩ nebã fãa yɛɛs wʋsgo.

A Bɛlsazaar yaa a Nebukadnezaar yagenga. Yaa yẽ la Babilon rĩmã masã. A kɩtame tɩ b bool a bãngdbã t’a yeel-⁠b yaa: ‘Ned ninga sẽn na n tõog n karem gʋlsmã la a wilg a võore, m na n kõo a soab kũun la m kõ-a naam t’a lebg tãab-⁠n-​soab soolmã pʋgẽ.’ La bãngdbã baa a ye ra pa tõe n karem gʋlsmã meng tɩ pa sokd a võor wilgr ye.

La rĩmã ma wʋma rĩmã ne a nin-​kãsemsã goamã n kẽ kibsã roogẽ wã n yeel rĩmã yaa: ‘Ra yɛɛs ye. Rao a ye n be fo soolmã pʋgẽ n tar Wẽnnaam sẽn yaa sõngã sɩɩga. F yaab-​raoog a Nebukadnezaar kɩtame t’a lebg yam dãmbã naaba. A yʋʋr la a Daniɛlle. Kɩt tɩ b bool-⁠a t’a wa wilg gʋlsmã võor n kõ-fo.’

Tao-​tao bala, b talla a Daniɛll n wa rĩmã taoore. A Daniɛll yeelame t’a na n togsa gʋlsmã võore, la a pa na n deeg kũunã ye. A reng n wilga bũmb ning sẽn kɩt t’a Zeova sik a Bɛlsazaar yaab-​raoog a Nebukadnezaar naamẽ wã. A yeelame tɩ yaa a Nebukadnezaar sẽn da yaa wuk-⁠m-​meng soabã yĩng la a Zeova sẽn sɩbg-⁠a wã.

A Daniɛll yeela a Bɛlsazaar yaa: ‘Yãmb bãngã rẽ fãa la y ket n ka sik y meng ye. Yãmb kɩtame tɩ b rɩk a Zeova roogã laas n wa tɩ yãmb tall n yũ y rãam. Yãmb pẽga y wẽnnaam dãmbã sẽn maan ne raad la kugã, n ka waoog Wẽnnaam ning sẽn so y vɩɩmã ye. Yaa woto yĩng la Wẽnnaam tʋm nug t’a puk n gʋls gʋlsmã.’

A paasame yaa: ‘Ad gʋlsem ning sẽn gʋlsã: MENE, MENE, TEKEL, la PARSIN.’

‘MENE rat n yeelame tɩ Wẽnnaam sõda y rĩungã rasem sõore, la a yãka a tɛka. TEKEL rat n yeelame tɩ b maka yãmb ne kɩlo n mik tɩ y yaa faasga. PARSIN rat n yeelame tɩ b pʋɩya y soolmã n kõ Meed ne Pɛrs nebã.’

A Daniɛll sẽn da wa n gomdã meng tɩ Meed ne Pɛrs nebã ra zoe n waame n sɩng zabr ne Babilon nebã. B zabame n deeg tẽngã la b kʋ a Bɛlsazaare. Yaa yʋn-​kãng bal la gʋlsmã sẽn yeel bũmb ningã paam pidsgu. La bõe n na n paam Israɛll nebã masã? D na n wa yãa rẽ, la nananda, bɩ d ges bũmb ning sẽn paam a Daniɛlle.