TLAPOUALISTLI 78

Tlajkuilol tlen okatka itech tepamitl

¿TLEN panotok nikan? Ninmej tlaltikpaktlakamej kipiaj se ueyi iluitl. Ueyi tekiua itech Babilonia okinyole miakej tlaltikpaktlakamej tlen ueyititokej. Kintekitiltijtok copas tlen okichijchijkej ika oro uan plata uan tazones tlen okinkixtijkej itech iteokali Jehová tlen okatka Jerusalén. San niman, imajpil se tlakatl moita uan peua tlajkuiloa itech tepamitl. Nochtin momojtiaj.

Belsasar, ixui Nabucodonosor ye axkan okatka ueyi tekiua. Uan okijto ma kinualikilikan ixtlamatkej tlen okitekichiuiliaya. Ueyi tekiua okijto: ‘Akin uelis kitlajtoltis tlen omoijkuilo uan nechiluis tlen kijtosneki, kiselis miakej tetliokolilmej uan yetos eyi akin okachi ueyititos itech notekiuajkayo’. Maski ijkon, nion se akin omoijtoaya ixtlamatki amo ueli okitlajtolti tlen oijkuilitoka itech tepamitl, nion amo ueli okijto tlen okijtosnekiaya.

Inantsin ueyi tekiua okikak tlen opanotoka uan san niman okalak kanin otlakuajtokaj. Ye okilui ueyi tekiua: ‘Nimitstlatlaujtia amo ximomojti. Nikan itech motekiuajkayo onka se tlakatl tlen kimati tlen kijtoaj teotsitsintin. Ijkuak mokojkol Nabucodonosor okatka ueyi tekiua, okitlali pampa ma kinyekanaj nochtin ixtlamatkej. Itoka Daniel. Xitlanauati ma uiki uan ye mitsiluis tlen kijtosneki nochi nin’.

San niman okiualikakej Daniel. Daniel amo okinek kiselis tetliokolilmej, ye okijto tleka Jehová ayakmo okikauili Nabucodonosor ikojkol Belsasar, ma yeto ueyi tekiua. Daniel okilui: ‘Ye sapanoa omoueyimatiaya. Uan Jehová okitlajyouilti’.

Daniel okilui Belsasar: ‘Te otikmatiaya nochi tlen okipanok mokojkol uan maski ijkon, ok timoueyimati ijkon ken okatka Nabucodonosor. Otikinualikak uan otitlakonik ika copas uan tazones tlen okatkaj itech iteokali Jehová. Otikinueyichi teotsitsintin tlen okinchijchijkej ika tetl uan ika kuauitl uan amo otikueyichi akin Yekkuali oTlachijchi. Ik non, toTajtsin Dios okichi ma moijkuilo ninmej tlajtolmej’.

Daniel okijto: ‘Nin tlen ijkuilitok: MENÉ, MENÉ, TEQUEL uan PARSÍN’.

‘MENÉ kijtosneki toTajtsin Dios okijto san keski tonalmej uejkauas motekiuajkayo uan yokijto axkan tlamis. TEQUEL kijtosneki omitstamachijkej ika balanzas uan okitakej te amo tiyolkuali. PARSÍN kijtosneki motekiuajkayo kimakaskej medos uan persas’.

Ijkuak Daniel ok otlajtojtoka, medos uan persas opejkej kiteuiaj Babilonia. Okimoaxkatijkej altepetl uan okimiktijkej Belsasar. San niman ipan non yoak omochi tlen omoijkuilo itech tepamitl. ¿Uan axkan tlen kinpanoskiaj israelitas? Satepan tikitaskej tlen opanok, maski ijkon, axkan ma tikitakan tlen okipanok Daniel.

Daniel 5:1-31.