Tlajkuilojli ipan tepantli
Historia 78
Tlajkuilojli ipan tepantli
¿TLENON panotika nikan? Kipiyaj se ueyi iluitl. Akin tekiuajti ipan Babilonia kinnotsa miyekej akin uejueyixtokej. Niman kintekitiltijtokej copas tlachijchiujtin ika oro, plata iuan tazones tlen okinuajkuiteuj ipan iteopan Jehová ne Jerusalén. Kuakon kitaj, kenon uajnesi imajpiluan se tlakatl tlen peua tlajkuiloua ipan tepantli. Nochimej melak nomojtiaj.
Belsasar, ixuiuj Nabucodonosor, yejua akin aman tekiuajti. Tsajtsi makinnotsatij tlamachilisejkej tlen tekitij itech. ‘Akin uelis kipouas yejuin tlajkuilojli niman nechijlis tlen kijtosneki’, kijtoua tekiuaj, ‘kiselis miyek tetlayokoliltin niman yejua ika yeyi akin tlanauatis itech tekiuajyotl’. San ika, nion se itech yejuin tlamachilisejkej ueli kipoua tlajkuilojli tlen onka ipan tepantli, nion xueli kijtoua tlen kijtosneki.
Inan tekiuaj kikaki tlen panoua niman yauj kampa tlakuaj. ‘Nimitstlajtlanilia, maka melak xmomojti’, yejua kijlia ikoneuj. ‘Ipan motekiuajyo nemi se tlakatl akin kipiya itlamachilis tajtsitsintin. Ijkuak moabuelo Nabucodonosor tekiuajtiya, otlanauati yejua makinyekana nochimej akin tlamachilisejkej. Itoka Daniel. Xtlanauati makuajuikakan, niman Daniel mitsasikamachiltis tlenon kijtosneki.’
Kuakon, nimantsin kuajuikiliaj Daniel. Sakin, ijkuak Daniel kijtoua ika xkiselis tetlayokoliltin, peua kijlia tleka Jehová xok okikauili matekiuajti Nabucodonosor, iabuelo Belsasar. ‘Yejua melak noueyimatiya’, kijtoua Daniel. ‘Niman Jehová okitlajyouilti.’
‘Niman tejua tikmatstika tlenon ipan onochiuj’, Daniel kijlia Belsasar, ‘san ika, tejua ok timoueyimati ijkon ken Nabucodonosor katka. Otikinuajkuiteuj copas iuan tazones tlen onkatkaj ipan iteopan Jehová niman ipan otitlaonik. Noijki yotikinueyichiuj tajtsitsintin tlachijchiujtin ika kojtli iuan temej, niman xtiktlakaita akin melak otexchijchiuj, akin xakaj ijkon ken yejua. Ika yejon, toTajtsin okichiuj manoijkuilo yejuin tlajtoltin.
’Yejuin tlen onoijkuilo’, kijlia Daniel: ‘MENÉ, MENÉ, TEQUEL niman PARSÍN’.
‘MENÉ kijtosneki ika toTajtsin yokijto kech uejkauis motekiuajyo niman noijki yokijto kemanon popoliuis. TEQUEL kijtosneki ika yomitstemachiuj ika balanzas niman yokitak ika xkuajli moyojlo. PARSÍN kijtosneki ika motekiuajyo kinotlatkitiskej medos niman persas.’
Ijkuak Daniel ok kijtojtika yejuin, medos niman persas peuaj kixnamikij Babilonia. Notlatkitiaj ueyikalpan niman kimiktiaj Belsasar. ¡Tlajkuilojli tlen nesi ipan tepantli nochiua yejon yeuajli! San ika, ¿tlenon inpan nochiuas israelitas? Tikitaskej sakin, aman oksejpa matomachtikan itech Daniel niman ijkon tikmatiskej tlenon ipan nochiua.
