Relato 78: Skirbimentu Riba Muraya
KIKO ta sosodé ei? E hendenan ta selebrá un fiesta grandi. Rei di Babilonia a invitá mil hende importante. Nan ta usa kòpi i kònchi di oro i plata ku nan a kohe for di e tèmpel di Yehova na Yerusalèm. Anto diripiente dede di un man di hende a aparesé na laira i a kuminsá skirbi riba muraya. Tur hende a spanta.
Belsasar, nietu di Nabukodonosor, ta rei awor. El a grita pa trese su sabionan. E rei a bisa: ‘Ken ku por lesa e skirbimentu aki i bisa mi su nifikashon lo risibí hopi regalo i bira e di tres gobernante mas importante den e reino.’ Pero ningun di e sabionan no por a lesa e skirbimentu riba muraya, ni no por a duna su nifikashon.
Mama di e rei a tende e boroto i a drenta den e sala di komedor grandi. El a bisa e rei: ‘Por fabor no spanta asina. Tin un hòmber den bo reino ku konosé e diosnan santu. Ora bo tawela Nabukodonosor tabata rei el a hasié hefe di tur su sabionan. Su nòmber ta Daniel. Lag’é bin, i e lo bisa bo kiko tur esei kier men.’
P’esei nan a trese Daniel umbes. Despues di a nenga tur regalo, Daniel a kuminsá bisa nan pakiko Yehova a yega di kita Nabukodonosor, tawela di Belsasar, komo rei den pasado. Daniel a bisa: ‘E tabata masha orguyoso i Yehova a kastig’é.’
Daniel a bisa Belsasar: ‘Pero abo tabata sa tur loke a pas’é, i tòg bo ta mes orguyoso ku Nabukodonosor tabata. Bo a trese kòpi i kònchi di e tèmpel di Yehova i ta bebe for di nan. Bo a alabá diosnan trahá di palu i piedra, i bo no a duna onor na bo Gran Kreadó. P’esei Dios a manda e man pa skirbi e palabranan ei.
Daniel a bisa: ‘Esaki ta loke tin skirbí: ‘MENE, MENE, TEKEL, PARSIN.’
‘MENE kier men ku Dios a konta e dianan di bo reino i a pone fin na dje. TEKEL kier men ku bo a ser pisá riba balansa i tin falta. PARSIN kier men ku bo reino a ser duná na e medo- i personan.’
Miéntras ku Daniel tabata papia ainda, e medo- i personan a kuminsá ataká Babilonia. Nan a kapturá e stat i a mata Belsasar. Loke a ser skirbí riba muraya a kumpli e mesun anochi! Kiko a sosodé ku e israelitanan awor? Nos lo haña sa pronto, pero laga nos mira promé kiko a pasa ku Daniel.
Daniel 5:1-31.
Pregunta
- Kiko a sosodé ora e rei di Babilonia a tene un fiesta grandi i a usa e kòpi- i kònchinan saká for di Yehova su tèmpel na Yerusalèm?
- Kiko Belsasar a bisa su hòmbernan sabí, pero kiko nan no por a hasi?
- Kiko mama di e rei a bis’é pa hasi?
- Segun loke Daniel a bisa e rei, pakiko Dios a manda e man pa skirbi riba muraya?
- Kiko Daniel a splika ku e palabranan riba muraya ta nifiká?
- Kiko a sosodé promé ku Daniel a kaba di papia?
Preguntanan adishonal
- Lesa Daniel 5:1-31.
Splika e diferensia ku tin entre temor di Dios i e temor ku Belsasar a sinti ora el a mira e skirbimentu riba muraya. (Dan. 5:6, 7; Sal. 19:9; Rom. 8:35-39)
Kon Daniel a demostrá un kurashi tremendo dor di papia ku Belsasar i su hendenan importante? (Dan. 5:17, 18, 22, 26-28; Echo. 4:29)
Kon Daniel kapítulo 5 ta enfatisá Yehova su soberania universal? (Dan. 4:17, 25; 5:21)
